朗尼完勝尼馬，國家隊入球效率超越兩大現役球王！ 精選

英格蘭同巴西比賽之前，巴西新星尼馬就表示英格蘭只係得朗尼算係球星可以決定比賽命運，而巴西就有好多人可以決定比賽命運。而係今日既比賽，朗尼一個入球、一次助攻，帶領英格蘭以2-1擊敗巴西，23年首次！而朗尼係球場上既表現完勝尼馬。
朗尼近期既狀態極佳，係曼聯最近10場比賽攻入10球，每個人都知道，一旦朗尼有返入球感覺，佢就無人能擋。而今日為英格蘭上陣既朗尼，就延續左係曼聯既好狀態，並且做左現役國家隊入波最多既球員。
比賽進行至26分鐘，韋舒亞送出直傳，禾確特右腳勁射被祖利奧施薩撲出，之後朗尼離門14碼射入空門，為英格蘭先開紀錄。呢一個入球係朗尼係英格蘭第33球，佢目前為英格蘭上陣79場比賽，平均每場攻入0.418球，入球效率甚至超越上年係國家隊比賽攻入12球既美斯(77場31球，平均每場入0.403球)，而佢昔日曼聯隊友C朗既入球效率連0.40球都未達到。英格蘭國家隊入波紀錄上，朗尼繼續排係第5，落後卜比查爾頓(49球)、連尼加(48球)、基里夫斯(44球)同奧雲(40球)，以朗尼依家仲未到28歲既年紀，至少仲可以為英格蘭再踢2-3年，極有可能成為英格蘭史上最佳射手。
當巴西係下半場追成平手之後，又係朗尼出手，幫助英格蘭搶回領先優勢，係第60分鐘，艾路卡回傳失誤，朗尼將球篤俾林柏特，林柏特離門18碼右腳勁射，個波擊中門柱內側入網，之後就雙方就再無入球紀錄，令英格蘭23年來首次擊敗巴西。而係比賽最後個幾分鐘，巴西大發撲既時候，朗尼亦都不斷回防，多次係中場搶走巴西控球權，令腳下功夫良好既巴西好頭痛。即使係一場友賽，但朗尼依出盡全力，打足全場。
尼馬雖然有啲輕視英格蘭，但佢話朗尼可以決定比賽命運確實一啲都無錯，下年係巴西舉行既世界盃，朗尼係英格蘭關鍵一員，度過幾次唔如意既大賽之後，依家既朗尼已經非常成熟，下年係佢表現自己既時候。