雲佩斯：我被冠軍包圍！ 精選

昨日完成左既英超21輪比賽，曼聯以4-0大勝韋根，其中雲佩斯梅開二度，目前以16個入球高居射手榜第一位，而同時曼聯就以7分既優勢排係英超榜首，一切都好似暗示緊，雲佩斯既第一個英超冠軍即將來臨。
舊年雲佩斯宣佈唔同阿仙奴續約，之後球會就即刻以2400萬鎊賣去曼聯，亦成為英超轉會最關注既轉會。目前賽程就過左一半，雲佩斯就延續左佢上季既好表現，英超入左16球交出6個助攻，並且多次係球隊落後既時候力挽狂瀾，包括上演帽子戲法反勝修咸頓、面對利物浦、車路士、曼城同阿仙奴都有入球。幫曼聯羸曬所有豪門既雲佩斯對自己表現好滿意，係今輪同韋根賽後接受曼聯官網採訪時，佢表示：「曼聯係一支特別既球隊，每個人都想幫對方：後衛力拼防守為中場減少壓力，而中場就全力輸送源源不絕既機會比前鋒。我地全隊都想取得冠軍，我感覺被冠軍包圍，咁樣會令我既工作變得好輕鬆。」
同時佢亦讚揚小豆同韋碧克今場既表現：「小豆既表現實在太出色啦，佢射門觸覺相當靈敏，韋碧克既表現亦都唔錯，特別係佢比我個球助攻，我需要做既事就只係要將個波送入龍門。」
雲佩斯過得開開心心，而佢既舊球會阿仙奴就無咁好彩啦，佢地要藉修咸頓球員既烏龍球先知可以逼和對手。雲佩斯每入一球，曼聯球迷都會好開心，而對於阿仙奴球迷黎講，雲佩斯係曼聯每入一球，就會有難過同歎息既心情。