利雲度夫斯基加盟或令朗尼離隊！！ 精選

德國同英國傳媒都表示曼聯已經成功收購利雲度夫斯基，佢將會係明夏正式加盟，咁個陣有五大前鋒既費Sir會點樣排陣呢？朗尼會擺係邊呢？《每日郵報》就認為費Sir好可能會將朗尼正式改造為一個組織型中場，亦唔排除格拉沙家族賣左朗尼換返利雲度夫斯基既轉會費既可能。
費Sir曾經講過現時曼聯四大前鋒同99年既四大神鋒有得揮，但費Sir仍然唔滿足，德國同英國傳媒都確認佢已經提前用1800萬鎊收購多蒙特射手利雲度夫斯基。利雲度夫斯基加盟之後肯定會同雲佩斯組成前鋒線，咁朗尼個位置就難搞啦。12月初朗尼係3場英超比賽中入左5球，包括作客曼城既兩個入波，但佢今季既射門觸覺非常之唔好，作客史雲斯12次一對一，無一次係過到人，並且好早就被換左落場。
呢場並唔係朗尼今年第一次表現得咁差，第一輪作客愛華頓，佢狀態差到令人費解，第二輪主場面對富咸都係無改善，係第二輪之後佢就長期缺陣。今季朗尼係英超先入得個6球，係加盟曼聯以來同期第二少既入球數，只係比2年前佢話要轉會個陣多。費Sir可以賣走世界足球先生C朗，可以放走迪維斯，朗尼要離開曼聯亦唔係無可能。
今季加盟既雲佩斯經常拯救曼聯，佢係今季英超已經攻入13球交出6個助攻既驕人數據，而利雲度夫斯基係德甲83場入左40球，呢對組合足以繼續保持曼聯既火力。上輪朗尼缺陣既時候，曼聯依舊可以攻入4球，證明唔再依賴佢。曼聯要收購利雲度夫斯基唔單止要比1800萬鎊既轉會費，仲要比佢為期5年，總值2050萬鎊既合約，而朗尼周薪超過20萬鎊，精打細算既格拉沙肯定能夠計清呢筆數，賣走朗尼去套現並唔係奇事。當然，利雲度夫斯基加盟之後，朗尼好有可能會正式改打中場，而且朗尼係攻中位置上如魚得水，組織、射波、防守都可以一腳踢。係呢個位置上仲有今夏加盟既香川真司，朗尼缺陣既時候，佢就可以代替佢，不過佢自10月尾受傷之後就再無上陣過。呢家香川真司最大優勢就係同利雲度夫斯基既默契，因為佢地兩個係多蒙特蟬聯德甲冠軍既王牌鋒線。