曼聯成為英超豪門不敗紀錄終結者！！ 精選

曼城輸左呢場打吡之前，係今季英超唯一一隊保持不敗，雖然上星期先係歐聯恥辱性出局，但文仙尼仲係希望可以衛冕聯賽冠軍，令曼城高層降低對自己的怒火，但估唔到曼聯硬係鍾意係人地最需要羸波的時候，往往就要令人地繼續輸波。
雲佩斯係補時絕殺對手，唔單止打破左曼城今季的金身，仲將佢地跨季的主場不敗成績告終，自從2010年12月20號1-2輸左俾愛華頓之後，曼城係英超已經幾乎兩年唔知輸波的滋味，結果曼聯令佢地主場不敗紀錄係37場之後告終。值得一提的係，如果曼城今場無輸波，佢地就可以追平球會歷史上最長頂級聯賽的不敗紀錄(22場)，但最終都係功虧一貴。
曼城並唔係曼聯終結不敗紀錄第一個受害者，車路士亦都試過比曼聯終結不敗紀錄。2005年11月17日，車路士以40場不敗的成績作客奧脫福球場，結果比費查一球頭槌終結左呢個紀錄。
而呢次亦都唔係一至兩次摧毀英超爭冠對手的紀錄。係03-04球季的阿仙奴不敗奪冠，個支阿仙奴被認為係英超歷史上最佳球隊，係04年10月24日作客奧脫福之前，阿仙奴已經49場不敗，亦係英超歷史上最長不敗紀錄，結果雲尼斯達萊同朗尼的入波令阿仙奴的不敗紀錄告終。自從阿仙奴的不敗紀錄被終結之後，英超就告別左曼聯、阿仙奴雙龍爭霸的局面，而阿仙奴就再無拎過英超冠軍。曼城呢次主場不敗紀錄告終之後，恐怕會令佢地衛冕的信心受到巨大打擊，由其是岩岩先係歐聯出局，呢種心理創傷都要一定時間先可以好返，而文仙尼的帥位亦都岌岌可危。另外，曼聯同費Sir再次達到目的，唔單止擴大榜首領先優勢，仲令曼城受到重創，睇黎「嘈吵的鄰居」都要抖返一段的時間。