韋比今場執法幾乎毫無爭議,還是曼聯御用球證嗎??

曼聯新聞 於 14/01/2013 發表 收藏文章
今季首循環「雙紅會」,利物浦指「錯判」下輸波,當時球證希斯利成為傳媒炮轟對象。當時佢將舒維爾趕出場個一張紅牌爭議極大,而且華倫西亞博返黎個球十二碼亦值得商確。相比之下,利物浦有啲係對方禁區被侵犯,就被球證無視。今次曼聯主場迎戰利物浦,執法球證韋比賽前受關注度可以話係史無前例咁大!不過今場比賽韋比執法得幾乎無可挑剔。
上半場利物浦0-1落後,即是係利物浦球迷,埋怨既都係祖阿倫、唐寧等人既超低水準發揮,對於韋比既執法,唯一爭議點就係香川真司撞低拉爾拿,事情係發生於45分鐘,曼聯攻入利物浦禁區內,雲佩斯用後腳射門,但係就比韋斯登護空門,補射既香川真司膝蓋撞到拉爾拿心口,照道理應該要吹罰香川真司衝撞門將,不過,呢啲錯判對球賽既結果無影響。
利物浦球迷應該慶幸史基度爾係53分鐘無俾韋比趕出場,當時艾夫拿長傳俾韋碧克,利物浦防線最後一個人就係史基度爾,佢從後將韋碧克鏟低,理應要被趕出場,不過韋比手下留情,只係俾史基度爾一張黃牌,令到曼聯球迷極之不滿。擔任BBC嘉賓威爾斯名宿沙維治認為,史基度爾從後將韋碧克鏟跌,應該係要趕佢出場。如果真係要挑剔韋比,利物浦球迷倒不如慶幸仲可以11人應戰。
曼聯攻入既第二球,雲佩斯開出罰球,艾夫拿頭槌攻門,省中維迪個頭之後先入利物浦大門。賽後《每日郵報》截取左《天空體育》直播畫面,對呢一個入球提出質疑,認為艾夫拿當時頂中個波既時候,維迪似乎係處於越位位置,既然呢一球係當維迪攻入,艾夫拿助攻,咁就要仔細睇下兩人既位置係邊度。從慢鏡黎睇,維迪同艾夫拿幾乎平行,係電光火石之間係好難判斷呢一球係唔係越位,艾夫拿爭頂既時候,維迪係唔係企係個波身後,如果唔係既話就越位啦。不過除左《每日郵報》之外,好少媒體提到呢一個細節。
韋比被稱為「曼聯御用球證」,但呢一場「雙紅會」,外界的確好難挑剔韋比既錯判。整體黎講,韋比係今場賽事做得非常公正。今場球證唔係比賽焦點,對於任何比賽都係好事。《每日鏡報》亦表示,韋比今場執法得極之公正。今場比賽結束之後,球迷只會討論利物浦點解上下半場表現差別會咁大,而唔係將勝負歸究於韋比身上。
由08-09球季開始到今場比賽,韋比一共執法曼聯21場比賽,其中有8場主場、13場作客。比賽結果方面,韋比執法曼聯主場勝率係100%,而作客就只有54%,平均勝率係71%。計埋呢場比賽,韋比執法曼聯9次主場,曼聯全部獲勝。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→