曼聯4大前鋒入球數超越99年曼聯4大鋒煞同期,三冠王美夢可成真?

曼聯新聞 於 28/01/2013 發表 收藏文章
岩岩過左去既足總盃比賽,曼聯憑住朗尼、小豆同傑斯既入球,以4-1大勝富咸並晉級足總盃16強,而更關鍵既係,過左呢場之後,今季曼聯4大前鋒入球總數超越98-99球季同期,當時曼聯亦都係擁有4大鋒煞,最終奪得英超、足總盃同歐聯,成為三冠王!
今季雲佩斯已經為曼聯攻入22球,分別係:英超18球、歐聯3球、足總盃1球;小豆則入14球,分別係:英超8球、歐聯3球、足總盃2球、聯賽盃1球;第三射手朗尼岩岩攻入佢今季第10球,分別係:英超7球、足總盃2球、歐聯1球;而韋碧克就最少,只係得1球。四個前鋒合共攻入47球。
而對比係1998-1999球季同期,當時曼聯頭號射手係約基,佢攻入18球,分別係:英超12球、歐聯5球、足總盃1球;而佢拍擋高爾就攻入15球,分別係:英超10球、歐聯4球、足總盃1球;後備殺手蘇斯克查則攻入11球,分別係:英超6球、歐聯1球、聯賽盃3球同足總盃1球;而老將舒靈咸係最少入波既一個,只係得2球。四個前鋒合共攻入46球。
難怪連《每日郵報》都同意費Sir認為依家曼聯4大前鋒比99年三冠王個陣四大鋒煞更加強既觀點,當費Sir被問到依家曼聯條鋒線係唔係佢執教曼聯以來最強,費Sir表示:「我認為係既,雖然1999年4大鋒煞係非常出色既球員,係好難去挑剔佢地,但我地現時4大前鋒同樣係好出色,我好高興小豆又入多2球,令佢今季合共攻入14球,朗尼又入多1球,如果我地今季有3個球員可以入超過20球,我地就好有希望重奪三冠王。」
今季既入球總數已經超過上季12球既小豆亦表示,曼聯可以重現1999年既輝煌戰績:「所有人都知道,我地好想贏足總盃、歐聯同聯賽,我認為我地係有機會既,因為我地岩岩係足總盃晉級,依家我地就迎接兩場聯賽,之後就係國際比賽日,之後過多場就要對皇馬。我想拎曬三個冠軍,我想贏得三冠王!」而值得一提既係,1999年曼聯4大鋒煞一共攻入76球,依家曼聯4大前鋒既總入球只係差19球既距離。

如果喜歡我們的文章,請即分享到︰

標籤: 曼聯  費Sir  雲佩斯  朗尼  小豆  韋碧克  約基  高爾  舒靈咸  蘇斯克查  

留言


請按此登錄後留言。未成為會員? 立即註冊
    快捷鍵:←
    快捷鍵:→