高普:我地會準備好星期四既大戰

米活記者會 於 26/04/2016 發表 收藏文章
高普對於利物浦即將作客西班牙充滿信心,即使缺少幾名主力球員,但高普同樣表示球隊已經準備就緒與維拉利爾一較高下。


劍指巴塞爾的利物浦將於本週四造訪黃色潛艇維拉利爾,開始先客後主的兩回合較量,賽前高普先為球隊舒壓「我地成季既賽程都好緊迫,隊中既球員受傷並唔係因為太疲倦而引致。」

失去兩位鎮守中場中路大將:隊長軒達臣及德國國腳安利簡,加上本季突飛猛進的比利時前鋒奧歷基,高普依然不忘為球隊打氣「關鍵並不在於有否最強陣容去比賽,關鍵係,需要準備好去戰鬥。


「維拉利爾今季一樣踼左好多比賽,佢地之後都要對皇家蘇斯達,同埋佢地而家仲爭緊歐聯席位。我地一定要準備得好好,講緊既唔係話要有最強勁既陣容落場,而係需要完完全全地準備充足去落場。」

隊中正選右閘佳尼早前因病無法上陣對紐卡素,高普希望佢能夠及時復出作客維拉利爾既賽事,高普更表示,可能會考慮委派佢踼中堅位。


「上場對紐卡素,史基泰爾知道自己無得落場後,有啲唔開心,不過佢呢一刻狀態唔錯。自從我黎左利物浦後,基本上佢都無受過重傷,佢一向都係:可以訓練、落場同埋休息,但係同時佢一直都係:受少少傷、好番、受少少傷、好番、受少少傷,然後又再好番,不過當我地需要時,佢可以隨時上陣。」

「我地仲有史基泰爾、路夫蘭、高路托尼、盧卡斯同埋伊羅利 (Ilori),佢地都可以出任中堅位。我地能夠決定到邊位落場,但係我無法定一個排名 – 邊個排第一,邊個排第五咁,如果我同個球員講,你排第五,咁佢可能會交出排第六名既表現。」

「佳尼晚晚都嘔,我地必需輪換,奧歷基無法上陣,佳尼都可能無法上陣,盧卡斯連續踼左兩場,所以佢都未必會正選上陣。希望無人會覺得我地排錯陣啦,我地會嘗試排出最好既陣容。」

對於上場被紐卡素迫和,高普提醒球員要打醒十二分精神。


「你有無見到我地全隊上下都係度諗緊對維拉利爾既比賽?我地有足夠時期去準備好場比賽。如果你有留意拉蘭拿,佢上場波賽後非常不滿。而佢地亦唔會話 “來吧,維拉利爾”,因為佢地知道上場的表現,不足以取勝,但係呢一刻隊中既氣氛都唔錯,我依然見到不少唔錯既野。」

「好似上場咁既比賽,作為實力較強既一隊,有時都係需要點運氣既。唔計失左兩球波,我地其實踼得好好,被追和後我地都能夠控制番場比賽,呢樣野絕不容易。」

「我地一向都唔會放棄每一場比賽,所以對紐卡素果場,即使我地被追和後繼續進攻,想再入多球,都唔會令到球隊特別疲倦,我地爭少少就做到。係呢季入面,對新特蘭、修咸頓同埋紐卡素果陣都係咁,足足無左七分呀,我諗我地真係要諗諗點解克服呢個問題。」


*新開設既Facebook專頁,想更緊貼利物浦及足球有關既最新資料就Like啦!
Facebook專頁 : https://www.facebook.com/melwoodinhk/


Source: http://www.liverpoolfc.com/news/first-team/218238-jurgen-klopp-we-ll-be-ready-to-fight-on-thursday
標籤: 維拉利爾  佳尼  歐霸  

留言


請按此登錄後留言。未成為會員? 立即註冊
  • hflhh 於 26/04/2016 評論 NO. 1

    其實應該仲有個哥爾卡...

快捷鍵:←
快捷鍵:→