有威脅排名21的實力同戰術，卻沒有足以打敗排名99的心理質素。
睽違六十年，香港隊終於喺今年重返亞洲盃賽場，喺頭兩場面對阿聯酋同伊朗嘅時候，球員們充滿拼勁，死纏難打嘅打法，足以令兩支中東勁旅吃盡苦頭，縱使結果未盡如人意，但仍然得到球迷嘅掌聲，亦都令人有所盼望，香港隊可以喺最後一輪擊敗喺小組對手入面排名最低嘅巴勒斯坦，競爭最佳第三名嘅出線名額。
畢竟，同世界排名21嘅伊朗都踢到55波，對世界排名第99嘅贏波都唔出奇啦，係咪？
但時間嚟到第三輪分組賽，喺艾華頓補時嘅十二碼宴客後，香港隊以0:3不敵巴勒斯坦，以一場潰敗結束呢次亞洲盃嘅征程，亦都將典型嘅香港隊帶返去大家眼前。
過往我喺唔同嘅平台寫香港隊，都係會講港隊喺戰術執行上有咩不足，但今次我想講嘅唔係呢方面，畢竟今屆亞洲盃嘅香港隊，喺戰術全面發揮嘅時候喺可以將伊朗打到頭都痕埋，輸波代表我哋仲有嘢可以細執，但亦已側面證明咗「安氏港隊」喺戰術方面已經漸趨成熟。
但僅限喺「戰術全面發揮」嘅時候。
有睇晒三場亞洲盃分組賽嘅朋友，都唔難發現香港隊今日嘅表現，同前兩場大相徑庭。由一開波猜頭兩腳，長傳撻Q，及至向後解圍，果一刻開始，我就發現我熟悉嘅香港隊又返嚟啦。
由亞洲盃外圍賽，到亞運、世界盃外圍賽，再到今日嘅亞洲盃分組賽，我哋最欣喜嘅，係港隊對住強隊終於意識到自己唔需要死守，說服到自己係有足夠實力同對手一博。但當對住同級，甚至低一級嘅隊伍呢？力戰伊朗而敗，逼和土庫曼呢啲演出固然令人鼓舞，但唔好唔記得同期仲有主場對不丹下半場被反客為主，被柬埔寨逼和呢啲尷尬時刻。喺呢啲時候，逼搶嘅決心變成猶疑嘅「行(hong)住先」，傳波由傳落位到傳到腳，後場大腳嘅目標由傳送變成解圍，，急急腳就踢走，甚至射波嘅重心都向後，唔敢迎波。球員拎住個波，就好似玩緊俄羅斯練膽大法咁。
以上呢啲跡象，我會總括為球員「驚犯錯」嘅心態，而呢種心態，喺安帥嘅逼搶戰術之下係十分致命嘅。
逼搶戰術嘅其中一個關鍵在於「及時」，由敵方球員控低個波，觀察，作出傳送，往往只有一至兩秒嘅時間，逼搶嘅理念，就係要破壞敵方球員嘅Decision Making，令到佢地作出無咁好嘅決定，例如解圍、轉身、或者強行長傳，但如果港隊稍一猶疑，未能夠喺呢個時間點入面逼到對方，對方就可以順利拎到個波落嚟推進，同時令逼搶球員失位，做成好多高速突破嘅局面。喺對住UAE同伊朗嘅時候，無嘢好輸嘅情況下，全部人將士用命，戰術執行得宜，已經令強隊怯場，但嚟到對住比較弱嘅球隊時﹝都唔係講緊巴勒斯坦，係講緊柬埔寨果個等級﹞，唔知係咪因為心入面覺得自己有得贏，心有旁騖嘅之下，反而會諗得更多，換嚟嘅就係錯過更多嘅時間，比對手有更多機會展開攻勢，進入港隊嘅心臟地帶。
對方越攻得順，自己越怯，越怯，做嘅決定就越保守，越驚犯錯。然而越驚犯錯之後，對手就會攻得越順，形成一個惡性循環。呢一場對巴勒斯坦嘅表現，就係呢個循環嘅表表者，亦都係今場表現令人失望嘅原因之一。
成為一支強隊，除咗要上限高之餘，亦都要提升下限。面對強隊，要有力一拼，面對弱旅，要穩操勝券。安達臣上任嘅呢幾年，球迷們最欣喜嘅，係我哋見到香港隊嘅極限正不斷提升，但要喺高質素嘅比賽站得住腳，除咗要有喺強隊手上博到分數嘅實力同拼博，亦都要穩贏要贏嘅比賽。安氏香港做到第一點，但第二點要點行，我相信球員要搵到提升心理質素嘅方法。
請按此登錄後留言。未成為會員? 立即註冊