逼搶有成，創造不足 - 香港對泰國賽後速評 精選

為準備嚟緊嘅亞洲盃比賽，香港隊今日﹝2023年6月19日﹞喺主場迎戰世界排名114嘅泰國。最後，泰國隊憑曾外流日職嘅前鋒鄧達﹝Teerasil Dangda﹞嘅半單刀，射近柱射破葉鴻輝嘅十指關，以一比零小勝港隊。呢篇文將會簡評香港隊嘅整體表現。
針對上場對越南嘅表現，我都有啲粗淺嘅評價，有興趣可以撳呢度睇返！

逼搶同中路防守有所進步

如果各位有留意開港隊新聞嘅，都會知道現任港隊主帥安達臣相當強調逼搶嘅踢法，但喺前幾日作客越南嘅比賽入面，我就認為球隊未能踢出逼搶嘅實際效果，虛有其形而不見其實。而今日嘅港隊雖然都係鎩羽而歸，但整體表現上，我認為比上場對越南有所進步。

喺比賽嘅中前段，港隊已經立即執行安帥嘅戰術，透過中前場嘅壓逼，令泰國隊出現唔少嘅犯錯，多次能夠重奪控球權，或者逼到泰國球員需要回後至三閘線，而即使泰國隊能夠從港將嘅壓逼入面殺出一條血路，適時嘅逼搶亦多次為港隊爭取重新佈防嘅時間，佈防嘅企位亦都準確，令泰國隊嘅攻勢未能直接打入禁區，需要喺禁區外圍猜傳。呢點係值得讚賞嘅。但我亦到見到，港隊球員喺第一、二次逼搶成功，泰國隊需要回後之後，未有立即跟進，繼續逼搶，泰國後衛就可以鬆容再做長傳或組織，令整個逼搶無功而還，就比較可惜了。
同時，泰國隊球員嘅個人質素亦真係喺港隊球員之上，佢哋嘅中場球員，基本功比港隊球員上乘，轉身走位亦相當靈活，呢啲特質正正就係港隊後防最唔識應對嘅﹝香港球隊對高Q大棍嘅對手反而比較有信心﹞。事實上，今場嘅逼搶亦都唔係次次都成功，但兩位外流中超嘅中堅喺今場嘅表現都相當集中，多次喺泰國隊鋒線射門之前閂走來球，落腳亦十分準繩，總括而言除咗勞烈斯喺失波果一下比鄧達慢，我認為港隊嘅中路防守表現都合格。


邊路防守出現漏洞

啱啱讚完港隊中路防守唔錯，但既然中場同正堅逼得好，咁點解中路仍然需要做咁多防守呢，我認為問題有唔少出於邊路嘅防守。今場港隊喺一對閘位上面用上茹子楠同梁冠聰。能夠立足中超嘅茹子楠實力屬港隊一線，今場亦滿場飛，邊路支援進攻之餘，亦都積極回防。但始終泰國隊球員嘅速度稍勝一籌，茹子楠喺防守方面亦要又拉又扯先勉強跟得上，顯得相當吃力，而速度更慢嘅梁冠聰受嘅壓力就更大。泰國隊見到自己喺邊路上有優勢後，就打蛇隨棍上，喺中路被壓逼，或打唔入嘅情況底下，將個波分邊，做邊路突破，加重咗其他守將嘅負擔。
安達臣主張踢進攻足球，當然會希望兩閘趨前幫手進攻出波，但面對泰國呢類速度型球隊，要求茹子楠同梁冠聰走上走落，會唔會高估咗佢哋嘅速度同體力呢？由其係速度出名唔快嘅梁冠聰，佢嘅長傳係有一手，但係咪真係瑕不掩瑜，令佢成為今場閘位最適當嘅人選呢？我就有啲疑問啦。

逼搶後嘅護球較上仗好，但之後…

逼搶，就係為咗爭取控球。如果逼搶後都係比返個波人，要二度、三度、四度逼搶，唔單只對球賽局勢無任何幫助，更會大幅消耗球員體力。今場其中一樣做得比上場好嘅，就係重奪控球權後，較少出現滾水淥腳，即刻就比返個波對面嘅情況﹝唔係無，只係少咗﹞。喺球賽初期，後半場逼搶成功後，球員唔需要單靠自己嘅身體質素擺脫對手，而係可以以兩至三腳猜傳製造空間，只係呢種配合隨住時間推移，喺30分鐘後慢慢消失，而今場茹子楠亦都可以憑腳下功夫，帶返生個波，幾個後衛可以舒服咁控球嘅時間亦都多咗。可以開始將個波做上中場。呢樣係今場做得好咗嘅地方，但同時突顯咗下一點。
後衛用球能力不足，中場亦未能支援

上場個個當個波炸彈咁，好快就傳失，我哋可能都以為係戰術問題。但今場隨住陳俊樂回勇，咁就突顯出勞烈斯，細佬梁諾恆同大佬梁冠聰嘅用球能力相對不足。

正如頭先所講，幾個後衛可以舒服咁控球嘅時間多咗，我哋亦都見到茹子楠可以帶生個波，將個波運上前場，令球隊攻守轉換更為流暢，但其他後衛嘅傳球成功率就相當低，呢個情況嘅出現，我認為除咗後衛嘅傳送質素較差之外，中場同後衛嘅距離亦都相對較遠，走嘅位亦都相對難比，令後衛需要作出更長途程嘅傳送，成功率自然偏低，屢次傳到中線左右，就已經被泰國球員反搶，原本向前攻緊嘅球員又要再次回身協防。消耗球員大量體力，亦對防守做成更大負擔。
體力不足以支撐高速比賽

以我嘅觀察，今日呢場波都算得上係近年香港隊踢過嘅比賽入面，速率最快嘅一場。但就因為上述所講嘅原因，未能保持控球，而消耗大量體力。喺今場波入面，我哋可以見到港隊喺60分鐘左右，逼搶嘅速率已經下降咗唔少，唔少球員表現得力不從心，步頭不穩，體力不足導致未能走位，做唔返開賽初段嘅配合而失去控球權，轉而需要防守果陣，港隊球員覆蓋嘅面積減少，泰國隊嘅進攻空間增多，泰國隊就成功運用呢個空位取得入球。

嚟緊嘅亞洲盃，多數嘅對手比泰國隊嘅質素更高，攻勢亦可以嚟得更快，如果要堅持逼搶，點樣控制體力留放係好重要嘅課題。但如果要控制到體力留放，首先就要保持控球權，但球隊又有先前提及嘅問題。一環扣一環之下，其實無辦法單獨解決。
中場表現回升，陳俊樂表現不俗

上篇文提到陳俊樂狀態唔好，經過咗幾日嘅調整。樂仔今場即刻生猛返晒。無論喺防守上嘅逼搶攔截，定係進攻上嘅梳理，都做得比上場好好多，今場亦有多次精彩嘅直線，但無奈前線球員未能把握。而黃洋大哥亦貫徹佢專業嘅態度，雖然體能上未必跟得上，但鬥志搭救，仍然能夠勉強纏住泰國隊嘅中場球員，但黃洋大哥今年都三十有九，隨住身體退化，大哥嘅速率只會越嚟越低，胡晉銘亦未必夠硬淨，安達臣都需要喺呢個位置搵返個替補。而Fatgor 林衍廷相信會係一個唔錯嘅人選。

而講到中場，亦都需要提一提黃威。黃威嘅定位一路都係一個純進攻中場，一路以嚟都唔算好積極參與防守，所以我一直覺得佢係喺港隊裡面，最融入唔到安達臣戰術體系嘅一個。見到陳俊樂自己做晒攔截，上腳，分波嘅情況底下，需要輸送再做配合嘅黃威就無疑被比下去，今場佢喺球隊嘅存在感亦唔高，算係相當可惜。
走位配合未如理想

頭先講到今場港隊傳送成功率偏低，除咗傳果個傳得唔好之外，另一個因素就係隊友嘅走位差。前場嘅安永佳同孫銘謙多次越位，浪費咗中場嘅一片苦心，後場組織嘅時候，亦見到多名球員走埋一疊，未能拉開對手之餘更加干擾隊友盤球。其他隊友同持球球員距離相當遠，亦無法提供傳波選擇比持球球員。呢啲係戰術融合同溝通問題。安達臣任內第一件事 – 逼搶已經成功做到，但只係成功逼搶係唔會帶來勝仗。所以喺攪掂逼搶戰術之後，安達臣就需要解決呢啲行軍上面嘅沙石了。

前線侵略性不足

今場港隊前線繼續由安永佳，孫銘謙同羅梓駿擔大旗，但表現就喺水準以下，令人失望。
安永佳延續上場把握力不足嘅問題，亦都見到佢受制於對方高大中堅嘅壓逼，力量上完全對唔贏。喺持球推進底下亦見到決定有遲疑，同孫銘謙之間嘅默契欠奉。之前我都講過，安永佳喺中甲嘅入波多數都係只處理最後一腳，叫佢喺港隊自己帶順射門係咪啱嘅呢，呢方面亦都希望大家評論吓。

另一個我想講吓嘅係羅梓駿。呢個喺傑志踢閘嘅球員，嚟到香港隊變咗翼鋒，相信安達臣係想利用佢嘅速度喺邊路進行突破，但無奈後衛出身嘅佢，First Touch、護球能力同單對單嘅突破技巧仍有大量進步嘅空間，揠苗助長將佢擺上嚟今日嘅翼鋒位置，就令佢變成攻勢黑洞，同唔少球迷心目中嘅戰犯。隨住艾華頓入籍，陳晉一傷癒，張熹延Debut，相信羅梓亦未必需要再擔當咁多嘅進攻任務，而今日茹子後上助攻嘅表現亦比羅梓好，我個人認為甚至可以將佢哋嘅位置對調一試。
前線持球後跟進不足

前線啞火，除咗前線自己未做得好之外，中場嘅跟進幫波亦都好重要，但由於港隊中場喺前場球員持球時跟唔上，令到前鋒球員孤軍作戰亦都係一個大問題。孤立無援底下，前鋒擔位一次兩次，去到其他球員嚟到夾擊，中場都仍然未上到嚟，咁無辦法，攻勢只會完結，又要返去守。如果中場能夠提供一點可以回後，可以梳理好進攻節奏，再慢慢做出操練過嘅戰術，出嚟嘅效果會好好多。

後備表現令人驚喜

今場安達臣喺65分鐘之後作出唔少調動，後備落場嘅球員入面有唔少都有唔錯嘅表現。

鞠盈智接替黃威擔任進攻中場，速度雖然不及黃威，但傳送嘅質素比黃威高，亦更能貫徹安帥嘅逼搶風格，但呢位老將嘅體能能否逼足90分鐘，就係一個疑問。
黃梓浩接替梁冠聰擔任右閘，帶領防線速度有所提升，而且後上進攻更具威脅。

艾華入替羅梓駿後，明顯表現出更佳嘅進攻技巧，成功利用更好嘅身體條件同速度，對泰國隊邊路做成一定威脅。

張熹延入替孫銘謙，上演港隊嘅Debut，表現出相當嘅膽識同技術。靈活嘅走位成功將攻勢帶入泰國後防心臟地帶，臨完場嘅一扣一射令人印象深刻。

小結 – 逼搶有成，創造不足

縱觀呢兩場嘅表現，我認為安達臣有喺逼搶上作出調整，但我哋要嘅係贏波，而逼搶唔代表贏波，而只係贏波嘅第一步。破壞完對手嘅攻勢之後，如何組織自己嘅攻勢，並轉化成入球，呢啲就係安達臣喺亞洲盃之前要好好聚焦嘅地方。
針對上場對越南嘅表現，我都有啲粗淺嘅評價，有興趣可以撳呢度睇返！

港隊球員評分﹝10分滿分﹞
葉鴻輝 6.5
勞烈斯 7
梁諾恆 7
茹子楠 7
梁冠聰 5
黃洋 6
黃威 5
陳俊樂 6.5
羅梓駿 4.5
孫銘謙 5.5
安永佳 5

張熹延 7
艾華 7
胡晉銘 5.5
余煒廉 5.5鞠盈智 6.5
黃梓浩 6