港足球證風波小總結

球場上的維他奶 於 20/04/2021 發表 收藏文章

足總琴日就愉園教練鮑家耀同球員林衍廷涉嫌性別歧視嘅案件進行紀律聆訊,結果亦都已經出咗,除咗執行停賽之外,呢件事亦都相信告一段落。因為歧視而被罰停賽嘅事件喺世界各地都時有發生,但喺香港卻甚為罕見。以下,我將會就呢件事做一個小總結,並展望將來,希望足總﹝唉﹞同唔同嘅持份者將來可以同心協力,提升執法水平之餘,提升運動從業員嘅個人素養。

事件起因:
2021年3月21日,喺天水圍飛馬以一比零擊敗愉園嘅賽事入面,由於球證羅碧芝執法相當具爭議性,球場內外投訴聲四起。喺比賽尾段,先有林衍廷喺投訴球證執法果陣,暗示羅碧芝同飛馬外援有關係,被判投訴過激而紅牌被逐。而賽後,愉園教練鮑家耀就表示希望唔好再有女球證執法,因為體能根本跟唔上。

事件發展:
羅碧芝事後就兩者言論向賽會投訴,經過一連串紀律聆訊之後,判鮑家耀同林衍廷停賽十場。愉園表示有機會就鮑家耀嘅判罰提出上訴。

判罰合理?
判決一出,網上言論四起,唔理部份對男女平權一無所知嘅盲毛,有唔少球迷都表示覺得判停賽十場嘅刑罰太重。我都認為相對較重,但亦理解足總嘅判罰基礎。

比大家做個參考先。喺2012年10月15日,利物浦主場與曼聯打成一比一嘅賽事入面,利物浦前鋒蘇亞雷斯就先後多次以N word 羞辱曼聯左閘艾華。賽後,蘇亞雷斯被判罰停賽八場,並罰款四萬英磅。

當英超嘅種族歧視都只係判八場,加上英超場數較多,無咗八場,最多都係無咗五份之一季,反觀港超,一季連銀牌,足總盃,銀牌,菁英盃等,多極都可能只係35 場比賽,停十場就等於無咗三份一季,對球員,教練同球隊而言,都係一個嚴重打擊,所以,小弟我都覺得呢個係一個較重嘅判罰。但我自己覺得足總判出咁重嘅刑罰,其實係相起殺雞儆猴嘅作用,以證明足總喺處理歧視呢方面嘅問題嘅時候,絕對係0容忍。

後續跟進:
件事就唔發生都發生咗,鮑Sir 同FatGor 兩個人亦的確係講錯野,但佢地對執法水平有意見亦都的確係事實,咁又有無啲咩方法,一方面可以緩解對女性球證嘅壓逼,另一方面令球證水平,甚至係運動員水平有所提升呢?

1.足總應該闡明並調整有關球證體測嘅標準
今次鮑Sir 嘅批評,主要圍繞女球證嘅體能問題。女性體能係咪一定比男性差,我唔會喺度落定論。但如果Gigi 過得體測,就即係代表佢嘅體能有足總認可,能夠喺港超聯賽事執法嘅水平。但今次呢件事,係反映咗部分體測合格嘅球證,未能夠喺球賽入面有足夠嘅體能跟足,亦即係話,足總對球證嘅體能測試嘅合格條件可能過低。經過今次事件之後,足總應該重新審視對球證嘅體能要求,以避免體能唔合格嘅球證﹝不論男女﹞繼續執法,影響球賽公平性。

2.提升球員素養
球場上勝負難分,激動,實在係人之常情。但激動還激動,唔代表可以出言不遜,特別係Fatgor。如果佢果句係喺Office 發生,我相信佢都距離被炒不遠。
運動員作為公眾人物,肩負起對香港足球,香港體壇,甚至香港嘅聲譽,所以,佢地對於社會價值亦都要有一定嘅認知,但部份足球員學歷未必好高,足總可以考慮加設一啲體育倫理嘅課程,用一兩個鐘簡述社會對運動員嘅道德期望同準則,如果都係唔聽….
咁你死你事啦…

總結:
香港作為國際大都會,種族融和、男女平等等價值觀,正正係香港嘅優勢之一。今次嘅性別歧視事件,既是不幸,亦都係一個讓我地重新審視何謂男女平權嘅契機。亦都指出咗唔少足總喺運作上嘅痛點。希望大家都可以經一事,長一智,之後嘅港足,體壇,都可以喺更開明,更健康嘅風氣下成長啦。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→