淺談富力 – 不尋常的種子,結下不尋常的果實

球場上的維他奶 於 15/10/2020 發表 收藏文章
講開香港波,唔同嘅朋友都有自己擁戴嘅球會,各為其主。但一講到大家嘅公敵,相信十個本地波球迷,有十個都會話係富力R&F?適逢今日富力R&F 宣佈將會退出超聯,小弟都想從中講下自己嘅睇法,仲會講下所謂嘅富力班底,究竟係可憐的人,定真係有可恨之處?

富力R&F 呢隊波,由四年前成軍起已經充滿住爭議,由當年參賽以中國球員為骨幹,到用燕子崗做主場,成為境外球隊,屢次漠視香港聯賽規限,仿佛有錢駛得鬼推磨,自然神憎鬼厭,但偏偏無能嘅足總望見富力呢條大水喉,就「來吧我甚麼都應承,來吧我甚麼都聽命。」,恨鐵不成鋼嘅情況底下,香港球迷用自己嘅方法對付富力,亦都係意料中事。

到球迷們真係開聲,反中資,反特權等等嘅口號不絕於耳,但偏偏球隊公關就一錯再錯,先講話如果無聯賽冠軍就退出,然後走數,攪到笑聲四氣,之後仲有盧均宜話拎咗冠軍再話你知有無資格,咁最後就梗係Proof 唔到資格啦。以上嘅種種說話,唔單只無幫富力特權球隊嘅身份解圍,更加令富力更加人見人憎。世間沒有無緣無故的恨,富力乞人憎嘅地方,真係莫過於「駛橫手」同「串串貢」。

說話留一線,日後好相見,未有實績就咄咄逼人嘅富力,折墮起上嚟就當然舉世歡騰。而家富力散班,球員教練們通通加入失業大軍,球圈人士紛紛話球迷厭尖聲悶,攪到宜家大家都無得撈亦都真係無謂。但唔好唔記得一點,當年大家加盟富力嘅時候,佢地係知道富力有幾乞人憎。既然知道,即使高薪在前,相信佢地都會理解份糧係比包埋比人問候娘親嘅道理。而球隊散班呢回事,球員喺加盟之前有無了解球隊管理質素同方針,作為一個成年人亦應該考慮在內。簡而言之,而家呢班所謂嘅富力苦主,就只係一班轉工轉著垃圾公司嘅員工,係咪陰功?係。但係咪無辜?我相信唔係。

有人覺得富力死就死喺中港關係冰點,大家嫌棄大陸人呢件事上面。但我認為,富力嘅原罪或者關少少政治事,但絕對唔係主因。君不見東方都係大陸資金撐腰,但大家都係講兩句佛山隊,充其量叫開下玩笑。但富力嘅出現,就係將大陸財大氣粗,金元至上嘅價值觀同行事方式帶到香港足球。自然惹起以規例為本嘅球迷不滿,加上多次食言同鬧劇,富力嘅身份早已成為孔乙己,一進酒場,哄堂大笑。

換句說話講,其實如果當初富力唔係咁急,係都要霸王硬上弓直接踢超聯,而係透過買會籍進入聯賽,又或者好似當年嘅橫濱FC 香港咁循規蹈矩,大家對佢嘅印象亦都未必真係會咁差。但富力撤出已成事實,香港球迷無疑為香港足球嘅尊嚴打咗一場勝仗。

只希望足總醒悟,將來唔好再見錢開眼,如果唔係,只會有更多球迷背離香港足球。

如果喜歡我們的文章,請即分享到︰

標籤: 港足  港超  香港波  富力  足總  香港足球  本地波  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→