傑志大敗的木桶理論和梅菲定律

球場上的維他奶 於 20/08/2022 發表 收藏文章

前言

喺星期五嘅下午,傑志喺亞冠盃16強,面對泰超亞軍巴吞聯,吞下0:4嘅敗績。對於支持香港球隊征戰亞洲賽嘅球迷嚟講,絕對係一個沉痛嘅消息。而如果大家有睇到場波嘅話,都可能會發現有唔少嘅失球喺同門將嘅判斷有關。今日我就唔打算同大家逐個分析球員嘅表現住,而係希望先講吓傑志呢十年嚟一直懸而未決嘅問題 – 守門員。

先在此聲明,我自己係認為王振鵬絕對係港超頂尖嘅守門員之一,經驗足夠,身體質素好,16/17球季聯賽只失8球,亦都顯示出佢嘅實力底蘊。而保羅嘅質素亦都屬中上,如果大家覺得我以下對球隊同球員嘅分析係因為過去呢場波而戴咗有色眼鏡,歡迎留言指正。

兩個木桶

喺講點樣應用木桶理論喺傑志同呀鵬身上之前,我想先講講咩叫木桶理論。木桶理論,係指當我哋去砌一個木桶去裝水嘅時候,個木桶裝到幾多水,係由砌成木桶嘅木條之中,最短嘅一條決定,因為即使你其他嘅木條再長再高,裝多左嘅水都係會喺最短嘅木條嘅頂流走﹝如圖﹞。


咁呢個理論點解關事呢?我認為而家嘅傑志同埋呀鵬,都係兩個上面咁樣嘅目桶。

講咗呀鵬先,就正如頭先所講,呀鵬嘅實力絕喺港超絕對數一數二,喺港超,亞協同亞冠嘅賽場都為傑志立下好多汗馬功勞。強勁嘅身體質素,喺大連練出嚟同喺傑志繼續磨練出嚟嘅守門技巧都仿似一條又一條嘅又高又長嘅木板,令「王振鵬守門員」呢個水桶越嚟越高,但只可惜有啲嘢,係練都未必練到,其中一樣就係心理質素。喺琴日場波入面,唔難見到有兩個失波係因為門將猶疑而導致,而事實上,呀鵬喺香港嘅呢十幾年間,都屢次喺高壓力嘅比賽底下失誤,多年前嘅嘅銀牌決賽,到17年嘅亞冠盃外圍賽,到琴日嘅亞冠淘汰賽,都顯示猶疑呢個問題,一直牽制住呀鵬職業生涯嘅發展。我作為半個運動員,深深明白比賽果陣猶疑,其實同做錯決定帶來嘅惡果係一樣,但有時人嘅性格係天生,唔係咁容易改,強如當年利物浦嘅卡列奧斯都因為心理質素而令球員生涯蒙上污點。所以唔係話呀鵬唔啱,只不過,心理同決斷力呢方面,就絕對係限制「王振鵬」木桶容量嘅果一塊短木板。

呢一個故事嘅另一個木桶,就係傑志本身。傑志團隊本身就對王振鵬嘅實力委以信任。而王振鵬嘅實力亦都足以應付港超,但當球會嘅目標開始移向亞洲,相信要再一次審視一下門將呢一環係咪足夠支持球隊繼續前行。近幾年,傑志多次引入高質素嘅場區球員﹝例如明加索夫、巴爾拿同丹恩奴域﹞,呢啲「長木板」令場內嘅攻守更加有序,但偏偏門將呢個位,就無太大嘅變動。我唔相信傑志會方係唔知道王振鵬本身喺穩定性方面嘅弱點,但就可能無意識到呢方面就係令傑志呢個木桶裝得比較少水嘅短木板。但係就無喺呢方面培養接班人或者羅致球員,亦都因為咁,而喺唔少可以突破樽頸位嘅時候有所制肘。

傑志的梅菲定律

講完木桶效應,係時候要講梅菲定律。梅菲定律﹝Murphy’s Law﹞,有啲人可能會記得呢條Law 係講:Anything that can go wrong will go wrong,但喺呢度,我想指出嘅係,如果你心入面都已經知道同明白傑志喺守門員呢一部份存在嘅缺憾,特別係王振鵬同保羅嘅特點,都係喺高壓嘅情況下難以保持穩定發揮,意識到呢個問題,但唔去解決,係Worst Case出現嘅時候亦都與人無由。

進行產品設計嘅時候,設計師要盡量諗晒所有顧客可能諗錯咗,用錯咗,而需要修補嘅漏洞,然後進行改進,而唔係求神拜佛,希望顧客唔好用錯件產品而整親自己。同樣嘅道理放喺傑志身上,有漏洞無去Fix而出事,設計呢個團隊嘅人,都絕對有責任。

總結:出事過後

有啲人可能覺得我馬後炮,「如果今日呀鵬上晒身,你就唔會出聲啦。」但事實上,作為十年傑迷,對呀鵬喺重要時間出場,都總係有啲膽顫心驚。而喺賽前同唔同嘅球迷吹水,講到揀呀鵬定係保羅把關,大家都對呢兩位門將有所保留,證明呢個問題非一日之寒。

我相信呀鵬已經盡咗力,波亦都已經失咗,無謂再惡言相向。但喺嚟緊呢年無亞洲賽,呀鵬亦都逐漸年邁,傑志係咪需要喺門將方面再加強呢?培養新兵?定係繼續倚重保羅?相信教練團而家必需思考呢個問題啦。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→