葡萄牙對摩洛哥 賽後短評 - C朗的重擔

足球理性分析 於 21/06/2018 發表 收藏文章

世界盃B組分組賽第二輪,葡萄牙再次憑C朗入球拯救球隊,1比0擊敗摩洛哥全取3分,將摩洛哥踢出局。但比賽結果並不反映兩隊表現...

其實喺第一輪牙牙對決已經見到葡萄牙整體機會唔多,只憑C朗嘅把握力將僅有機會轉化成入球,主要因為葡萄牙本身戰術就係以穩守紀律為重。442陣式兩排4人防線阻擋對手進攻,以反擊製造機會。上場對西班牙守得算唔錯,令西班牙機會唔多,而且反擊速度又高,有幾個黃金機會。不過今場對摩洛哥連反擊嘅速度都無埋,對住需要必勝嘅摩洛哥,全場陷於苦戰。

葡萄牙喺領先一球後打法變得消極,有控球權時取向求穩,以橫傳回傳為主,希望保持控球慢慢消耗時間。當然另一個原因係摩洛哥從落後開始就不斷迫搶希望盡快追番一球,節奏快上快落,而節奏愈快對葡萄牙愈不利,葡萄牙要控制番比賽節省減慢速度無可厚非,可惜球員本身狀態不足,擺脫唔到摩洛哥既迫搶,令摩洛哥完全主導比賽。

葡萄牙球員無態最明顯係效力曼城嘅B.Silva,喺右邊完全無發揮,要邊樣無邊樣。以佢本身質素傳球成功率只得可憐嘅59%,連六成都唔到,絕對唔合格(要知道今場兩隊球員除左門將外,傳球成功率都有70%以上)。領隊山度士喺59分鐘就換走佢係明智之舉,但換入黎嘅Martins表現更差,空有速度但決定完全錯晒,幾時傳幾時去幾時回後完全無概念,葡萄牙幾次反擊機會都敗喺佢手上。當然唔只Martins,整隊葡萄牙喺摩洛哥嘅迫搶下連反擊都做唔到,所以C朗入波之後其實都好少再提到佢個名。

相反摩洛哥就不斷谷,不斷搶,中途只休息咗幾段,其他時間不斷搶搶搶,完全唔理解點做到,好似有無限體力咁。其中Amrabat如入無人之境,全場9次盤球過人有6次成功,身體又強壯,不斷挑戰葡萄牙防線,唔好忘記佢上場先因為腦震盪而被換走。整隊摩洛哥創造15腳射門但只有4腳中龍,有幾個非常黃金機會唔係炒飛機就省中人,好可惜。

講真摩洛哥兩場表現唔應該1分都無...下場風流波無壓力唔知可唔可以擊敗西班牙,攞番個尾彩。

而葡萄牙問題係防守雖然做得唔錯,但運唔到個波去對方三閘線製造攻門,全場10腳射門有6腳屬於C朗,禁區內只有4腳射門而C朗佔3腳,包括入球。如果葡萄牙表現再唔改善,好難走到更遠,但明顯葡萄牙今屆既戰術就係咁,入球重擔擺明交俾C朗。
標籤: 世界盃  葡萄牙  摩洛哥  C朗  

留言


請按此登錄後留言。未成為會員? 立即註冊
    快捷鍵:←
    快捷鍵:→