李斯特城對車路士 賽後短評 精選 深度

無獨有偶，歐聯16強被淘汰既3隊英超球隊，皆成功殺入足總盃四強，爭奪球隊最後奪冠希望。
今場車路士贏得非常驚險，如果唔係Schmeichel最後階段犯錯失波，用十二碼定勝負對雙方既表現先比較合理。原因係李斯特城迫到車路士完全喘不過氣。

李斯特城以442或者4411迎戰車路士；而車路士照樣用番433，Morata同Bakayoko正選。論發揮，李斯特城好過車路士好多，包括前李斯特城球員Kante。

事關Bakayoko表示乏善可陳，雖然不至於災難但對球隊無任何幫助，Kante作為佢既拍檔左補右補，幾次預判都成功截到李斯特城既攻勢，仲有一球助攻，Kante交足功課。Bakayoko半場被換走亦都非常合理，不過車路士整體表現並未有太大改善。
因為李斯特城既442正正克制住車路士既343。唔知大家有冇睇戰術分析「如何破解343」，影片入面所提及既442正正就係類似今場李斯特城。4後衛收窄入禁區防守車路士3箭頭，用左右中場Albrighton同Mahrez回防防守車路士一對翼衛，Albrighton今場超級活躍就係證明，助攻助守完全將Moses比下去。而且重點係用Albrighton防守Moses算係55波，但調番轉用Albrighton攻擊Moses絕對係Albrighton佔上風，而且再配合左閘Chilwell既助攻，李斯特城左路攻勢明顯比右路多。對面右路都係類似情況，Alonso唔算純正進攻球員，用Mahrez勉強可以應付，但如果調轉用Mahrez對Alonso，Alonso明顯比較吃力。不過好彩Mahrez有時會去中間，而且Mahrez今場發揮都唔算太好。

當車路士憑Morata反擊一球領先後，佩爾下半場換上Okazaki，李斯特城整隊立刻㩒制開始前場迫搶，效果亦非常好，下半場中段開始車路士被壓制，唔夠10分鐘就收到效果追平1比1。
其後時間都係李斯特城佔優，車路士鮮有反擊機會，或者因為週中歐聯對完巴塞，體力開始下降，其實進入加時對車路士應該較不利。不過鑑於李斯特城既迫搶較浪費體力，雙方累鬥累下Pedro把握到Schmeichel犯錯再次領先，佩爾到最後階段才換入已經為時已晚。加時上半場佩爾便應該作出換人，保持體力壓迫車路士才是上策。

點都好，足總盃四強係熱刺，曼聯，修咸頓及車路士，大家睇高邊隊？