阿仙奴對曼聯 賽後短評 精選

又一場扣人心弦既比賽, 食救心呢種感覺真係好刺激...

阿仙奴對曼聯雙方都以近期打得較順既陣容出戰, 無乜特別既變動

作客既曼聯以摩連奴打法當然係以防反為主, 一開波就以前場迫搶殺阿仙奴一個措手不及, 果然曼聯就以Lingard既迫搶迫左兩個入球番黎, 打窒左阿仙奴條氣

其實戰術上好簡單, 曼聯偷雞偷到兩球一定死守, 阿仙奴就一定圍住黎攻, Lacazette, Sánchez, Özil既配合確實可怕, 加上Ramsey既前插, 無防守壓力之下更加愈打愈有, 上半場曼聯唔失波真係叫好彩, 要不是D.Gea(全場14次撲救...)
原以為上曼聯半場守得到下半場應該輕鬆D, 點知開波無耐就失波, 又係Özil既傳送同Ramsey既前插造就Lacazette入波

Lingard防守時係當中場中咁打, Box to Box既打法, 得番一球優勢既曼聯都無諗住坐以待弊守得尾, 加強番反擊, Lingard就多左跑埋上去反擊

不過某程度上因為阿仙奴連埋上半場其實已經圍住攻左咁耐, 道氣谷足咁耐, 就係鬆一鬆既時候, Lingard既反擊加埋Pogba既冷靜處理, 輕鬆擴大番兩球優勢

講真入左呢一球之後阿仙奴道氣已經無晒, 節奏都慢番好多, 直到Pogba既紅牌
呢張紅牌係合理既, 只可以怪Pogba既唔成熟, 贏緊兩球, 個波係前場, Bellerín係正前面閘晒個波, 仲有冇需要檻埋個步呢?? 我睇英文既旁述講得好岩, 係呢個時候根本唔需要冒險檻個步, 唔需要出腳俾機會球證俾呢張紅牌, 係個個位置收步係合情合理...只可以講Pogba唔識諗

打少一個之後曼聯更加泊大巴, 換走進攻換入防守, 阿仙奴換走防守換入進攻, 最後曼聯成功守住完場

不過重點已經唔係呢場既結果, 而係下場曼市打吡Pogba既停賽, 曼城今季確係佔盡天時地利人和, 睇下下場曼聯守唔守得住曼城啦


photo from 101greatgoals