車路士對曼聯 賽後短評 精選 深度

賽前我諗大部分睇開波既球迷都估到將會係悶戰一場，但估唔到係悶到咁。因為兩隊都偏向守勢波，基本上邊隊先入一球都會玩死守，而Jones上半場22分鐘雙重犯錯，讓車路士大條道理發揮352既精髓。
車路士正選陣容352無乜大驚喜，繼續以防守為主，再用Giroud係前場作支點二傳俾Hazard接應製造反擊。整場比賽都出現左好多次，Giroud面對曼聯一對中堅都無處於下風，有幾球都差d直接頂到俾Hazard單刀。Hazard搏得個球十二碼，雖然唔係Giroud二傳，但正正就係轉守為攻時，Fabregas搵到Hazard長傳，Jones無迎頂第一點反而等波到，係最低級既錯誤，就俾Hazard攝前搶左，失先機加上速度不足，焗住落腳封阻射門，Hazard就等你落腳俾你剷，十二碼。

車路士領先一球後當然縮得更後更深。上場輸俾紐卡素我出片講過3中場既Bakayoko同Barkley(即今場Fabregas既位置)，經常性失位，暴露左自己身後既位置，令到防線同中場之間出現空位。但今場Bakayoko明顯轉番以企位遮線為主，經常同Kante、Fabregas形成緊密既3中場，企係防線前面保護，同上場輕出完全唔同，補番防線前面既空位，令到曼聯係中間無位進攻。或者係車路士領先令Bakayoko唔洗諗咁多，專心防守。
所以車路士整體表現無驚喜，就係穩健取勝，守得非常好。

至於曼聯繼續排出433，Lukaku雖為後備但應該未適合比賽，由Rashford繼續擔任正選前鋒，但根據上幾場表現，Rashford似乎有d迷失。

一開波無耐摩連奴用意好明顯，食過翻尋味，用Herrera manmark Hazard，防守時死跟，進攻時Herrera會墮後變成三中堅之一，將兩閘推上，比Matic更後，主要因為要留係後面防範Hazard反擊。但做又未做到非常徹底，始終Herrera骨子裡係進攻格，有時都會帶波上前。上前時就由Jones防守Hazard，而效果大家都知咩事，除左失個球外，都有幾球Jones被Hazard完爆。

中場方面繼續Matic拍Pogba，都係老問題，兩條友都極鍾意上腳，拖到節奏好慢，俾晒時間車路士防守。Matic鍾意控左波先再用身體擋住搵人俾，往往都拖幾秒先甩到波；Pogba就相反鍾意用身體擋住對手先，等對手埋黎先將個波帶向另一邊，開季時都Work既，但而家已經俾人睇通晒，連Fabregas都識搶你第一點。
Lingard既位置依然前面大範圍奔跑，但礙於車路士後防囤積太多人，好多時都要番後攞波，造成同Pogba、Matic撞位，不過都唔係咩新鮮事。前面Sanchez同Rashford打雙箭頭，Rashord偏右Sanchez偏左。兩個都唔係衝撞型之下面對車路士三中堅完全無甜頭，Sanchez被Azpilicueta Mark死晒；而Rashford係右邊一事無成，傳停帶射無一樣做到...半場時我係有諗過摩連奴會唔會即換，點知等到73分鐘先換。不過真係睇得出Lukaku係未Ready比賽。

前面無左Lukaku，Sanchez同Ashford明顯做唔到將個波Hold落黎再等隊友上，但曼聯仍然要簡單長傳吊上前場俾佢地追，就算攞到但已經被車路士球員包圍。

Herrera打中堅推一對翼衛上去，但Valencia老問題，面對Alonso同Bakayoko包夾，無乜落底機會，有一球穿到但禁區車路士球員比曼聯多太多，連傳中目標都搵唔到。另一邊Young就被睇死無左腳，Moses多次讓Young落底，但Young左腳傳中質素比右腳差太遠。左腳傳左幾球之後，Young就想用番右腳，但已經被人睇穿晒，無位起腳傳中。
如之前所講，今場波兩隊都擅長被動，車路士比曼聯踢得更簡單直接，就係22分鐘一個犯錯令車路士領先，車路士順理成章讓出控球權，塞死後防空間。而曼聯進攻問題就繼續被無限放大，有時唔係想將所有矛頭直指Pogba，但作為球隊既核心，當然會希望Pogba有突破性表現打破悶局，而唔係只做一個稱職既中場。戰術上Sanchez同Hazard今場定位相似，但表現亦高下立見。