車路士對利物浦賽後短評 精選 深度

好老實，呢場爭前四關鍵之戰，我坐係電腦面前訓著左幾次...
車路士繼上場對史雲斯，今場仍然以352出戰，Kante、Fàbregas同Bakayoko鎮守中場，前場依然依賴Hazard搭Giroud攻堅。

而利物浦稍作留力？算唔算留力呢？收起左Henderson將Arnold移入中場，上輪英超為留力歐聯都試過，不過上場右閘係Gomez今場係Clyne，其餘位置一樣。

一開波車路士目的好明顯，就係完全封鎖後場空間，讓出控球權俾利物浦。果然利物浦一直控球在腳，表現亦非常有耐性，不斷傳球，一有壓力就回後，慢慢等待機會...車路士間唔中都有一兩下反擊由Hazard帶動，不過威脅唔算大。

而上半場初段就咁過左30分鐘，直到車路士一次攻勢，Moses係右路傳中，v.Dijk同Lovren竟然都無緊貼Giroud，俾Giroud頭鎚頂向尾柱，Karius望住個波入網。
干地打響左如意算盤，亦係干地慣常既戰術：穩守，把握一個機會，再守到完場。

車路士既防守，亦將利物浦既問題表現出黎

車路士既352將中路完完全全封死，利物浦三箭頭經常移入中路大家都知，然後適時其中一兩個回後攞波將中堅拉出黎，另一個再走位製造空位入攝射門。但今場車路士中路有兩層防守，三中堅同三中場。利物浦三箭頭鍾意企係防守同中場之間，而車路士正正就將呢個空間壓縮，將利物浦三人好似三文治咁夾住，令到三人完全無空間發揮技術，基本上連波都未攞好已經被拍甩。

偏偏利物浦收起左Henderson。Henderson控制節奏方面雖然未去到大師級，但長傳轉邊方面有一定能力，但Wijnaldum呢方面真係...利物浦正選三中場Arnold、Wijnaldum同Milner都唔算創造型，Milner雖然好勤力走位但無人傳到d獨到既波。Arnold係中場更加患得患失，好記得輸完第一球之後，有一次完全走甩Fàbregas俾佢落到禁區底傳中，可惜車路士中間無人接應到，如果唔係已經2比0。
利物浦另一殺著反擊亦被車路士破解，因為車路士三中堅一直企係後場，利物浦反擊做唔到人數上既優勢，再加上Kante可以極速回防，三箭頭去到禁區只有做唔到射門而回後，車路士已經番晒黎防守，利物浦做唔到對羅馬時既反擊優勢。

車路士一直縮後，壓縮中場，利物浦只可以係外圍搓，傳中質素又差，d傳中唔係過晒頭就係唔夠高，俾車路士中堅輕鬆頂走晒。

就算高普換番Henderson入黎，換埋Solanke打424都無補於事，因為車路士實在守得太好，真正做到零空間。

而家車路士只落後利物浦3分兼打少一場，不過得失球差方面差太遠，車路士就算下場贏波追到同分都過唔到頭，利物浦只要最後一場對白禮頓做好自己攞3分就穩奪前四。
熱刺同車路士都仲有兩場，差兩分，而熱刺黎緊兩場對紐卡素對李斯特城，車路士對哈德斯菲爾同紐卡素，熱刺兩場對手護級成功後已經放軟手腳，只要做好自己，車路士就無機會追到。