曼聯對哈德斯菲爾 賽後短評

足球理性分析 於 04/02/2018 發表 收藏文章

上場對熱刺Pogba被換出,估唔到今場被McTominay代替其正選位置,眾球迷都跌破眼鏡,相信摩連奴既用意係想Pogba睇下,咩叫紀律。

McTominay正選,當然我既目光一定集中係佢身上...(本來想搵張McTominay既相,但全部傳媒都集中係Sánchez)

McTominay或者無Pogba既靈光一閃;無Pogba既技術;無Pogba既無限可能性;但換來既係紀律,沉穩,平衡;就係因為佢無Pogba既技術或者頭腦,佢甘於逗係中場,企係Matic旁邊,駁腳,轉邊,做呢D簡單唔起眼既工作,令到Matic壓力減少,進攻就放心交俾前場去做。

摩連奴放Pogba落後備,可能就係想Pogba學習唔洗用太花巧既技術,先做好自己既工作。

當然呢場哈德斯菲爾擺明死守搏一分,中後場都未受到太大考驗,全場圍住黎攻下,無左Pogba確係少左一瓣波,要破大巴好似老鼠拉龜,但我寧靜睇到呢種平衡,好過見到各自為政。

其次進攻方面Sánchez既勤力係無庸置疑,佢既鬥心係阿仙奴都見到,黎到曼聯都無變,努力證明自己,多次被哈德斯菲爾球員侵犯,佢都送左好多張黃牌俾對手。

不過呢種鬥心可以用係更好既地方,點解咁講?Sánchez好多時回後攞波,Sánchez重心低轉身快,有1個球員跟住仲轉到身,但多過1個圍攻時會被人睇穿,有幾次係中場夾硬轉身被對手偷走反擊,好彩哈德斯菲爾縮得太後反擊唔夠力。

Mata更加唔洗講,有Sánchez唔一定要犧牲Mata。Mata對空位既洞悉力就係唔同,開放絕對自己俾佢走,左中右都見到佢,助攻Lukaku就係走到左邊傳個靚中;球十二碼都係Mata係中間傳到Sánchez腳下搏到。而且見到Mata同Sánchez有啲火花,值得期待更多。
下半場換入Pogba摩連奴都無換走McTominay,正正可以趁呢個機會實驗推Pogba上一格,用兩名中場中從後面支援,完全解放Pogba。換入Pogba後既中場配置係Matic最後,左邊Pogba右邊McTominay,放Pogba係左可以配合Sánchez,今場都見到有幾球配合,不過最後換走Lukaku變Sánchez打正前鋒就無左。

如果上場對熱刺既敗仗可以令摩連奴驚覺由4-2-3-1轉4-3-3,加多一名中場去support前場的話,絕對輸得值。

就放長雙眼睇下摩連奴會唔會變。
標籤: 曼聯  

留言


請按此登錄後留言。未成為會員? 立即註冊
  • Hola Konichiwa 於 04/02/2018 評論 NO. 1

    條球霸好似想自己一個踢哂咁,垃圾

  • wombat 於 04/02/2018 評論 NO. 2

    渣古如果唔係入咗一球又係畀人屌到暈。
    馬達值得長期正選, 球場洞察力真係無出其右(好想佢過來利)。
    山神暫時仲係山狗一隻,要啲時間。 針冇兩頭利,鬥心強可以激起球隊,唔好處係好似全世界要圍住佢轉,成日話隊友唔交波畀佢話,或交唔到腳

快捷鍵:←
快捷鍵:→