曼市打吡 曼城對曼聯 賽後短評 精選 推薦

切勿跟車太貼，上半場同下半場好似睇緊兩場比賽咁...講真我都睇唔清發生咩事，因為上半場完左已經邊上網打機邊睇
首先講上半場，曼聯完全唔知發生咩事，第一好亂：中場定位唔清楚，Herrera任務模糊，Pogba患得患失；因為曼城打無鋒陣，曼聯後防一對中堅就不知所措，已經唔只一次被Sterling、D.Silva同B.Silva拉走，造成中門大開任人入，如果唔係Sterling屢失單刀，已經4比0甚至5比0。第二好慢，Matic同Pogba均上腳超過1秒以上，Matic係中場用身體頂住對手轉身傳球係佢慣常打法；Pogba鍾意上腳亦都唔係咩新鮮事，但Pogba多次甚至踩定個波，過左1個，過2個，過埋第3個最後都係要失...或者唔可以全怪Pogba，實在見唔到有咩選擇，至少畫面見到佢周圍無人幫波，因為平時呢樣野係Mata做既...

曼城留力週中歐聯亦都好合理，雖然話係留力但正選實力都唔係二線。上面講左無鋒陣多數由B.Silva企係前鋒位置，但B.Silva經常回後同走去右邊，Sterling當然就負責插入中位無人地帶。其餘同平常差不多，左邊Sane拉邊D.Silva支援，Fernandinho同Gündogan墮得較後，不過Gündogan後上插入做得更多。
上半場2比0，曼聯甚至0射門，全世界都覺得可以訓覺，包括我

唔知摩連奴半場講左d乜，但下半場曼聯的確變左第2隊波

首先無換人，Herrera位置比上半場墮得更後，差不多同Matic形成雙防中，有時甚至後過Matic。而且下半場Herrera既任務比上半場更加明確，就係盯死D.Silva，同Valencia合作防守曼城左路攻擊組合：Sane加D.Silva，效果亦非常理想，曼城係左路少左配合。

Herrera既墮後就換來Pogba壓得更上，Pogba入個兩球就突然出現係禁區內。

而且曼聯前場既波爽快左好多，呢樣我暫時都未解釋到，Sánchez，Lingard，Pogba等配合決定都比上半場快。唯一我見到既變化係Lukaku刻意轉左去右路，一名正前鋒拉邊？（定其實上半場都有做？因為上半場Lukaku影都唔見) 但呢一下拉邊反而讓左前鋒位俾Pogba同Sánchez其至Lingard插入，好似第2球咁Lukaku明顯靠右，Lingard係中間，Sánchez係左邊斬比攝入中間既Pogba。
到最後哥迪奧拿雖然話撳制，但黎緊既歐聯先係需要撳制既比賽，呢場輸下場都照攞冠軍。

其餘我都解釋唔到，半場既心態轉換係關鍵。

Young上半場球手球應該要俾十二碼。