世界盃F組分組賽,德國對墨西哥賽後短評

足球理性分析 於 18/06/2018 發表 收藏文章

墨西哥明顯有備而來。
好簡單,貴為上屆冠軍德國當然成為眾矢之的,所有球隊目標都係要砌低你,必定有針對性部署,所以衛冕咁高難度就係咁解。而德國嘅戰術明買明賣已經一早擺晒上枱面,兩翼內切,兩閘壓上,中前場高壓迫搶等等都耳熟能詳。而且睇番近期熱身賽,德國過去四場除咗小勝沙特阿拉伯入多過兩球之外,其餘三場不勝兼唔入多過一球。

墨西哥上半場戰術非常清晰,反擊。

今季好多強隊都鍾意用兩閘齊飛為球隊提供闊度,兼且可反壓對方翼鋒回防,例有擁有Kimmich嘅拜仁。而德國右路組合正正就係拜仁嘅右路組合Muller同Kimmich,我知道,你知道,墨西哥教練奧蘇利奧都知道。奧蘇利奧將黎自PSV嘅Lozano放喺Kimmich對應位置嘅左翼,Lozano慣用腳係右腳,左右翼都能夠勝任。憑佢飛快嘅速度多次喺左路發難,令到經常助攻上前嘅Kimmich瘋狂失位,其實開波未夠1分鐘Lozano已經有1次喺左路繞過Kimmich盲目位cut入大位起腳,呢腳已經係一個警號。不過Kimmich似乎未發現危機,繼續以攻代守,甚至經常走入中間同隊人換位,呢個亦係佢個人特性黎。

結果德國被墨西哥反擊針對黎打,小豆喺前場做支點分波做得好好,多次成功停球分邊,攻入全場為一入球甚至喺中圈第一時間彈後立即轉身跑,為自己製造空位。然後左翼Lozano從後怒爆上場,Kimmich因為助攻完全失位,甚至無全力回防,要Ozil幫佢包位?其實睇番重播當時德國進攻緊Kimmich係準備向前跑落底,Lozano人盯人跟實,之後墨西哥搶到波後Lozano立即向前跑,而Kimmich就選擇睇波。

當然除左右閘位置問題,德國嘅中場防守力同速度不足仍係老問題,墨西哥多次反擊Kroos同Khedira明顯有心無力想追都追唔到。

入咗波之後嘅墨西哥無刻意縮後防守,繼續部署人手喺前場反擊,上半場尾段其實睇得出墨西哥有少少體能下降,特別係Lozano回防要跟到底,反擊又要跑到底,其實消耗好大,令人擔心下半場無以為繼。

可能奧蘇利奧都知道體能問題,未夠60分鐘已經用第一個換人調動,換走Vela換入後防Álvarez,減少反擊點開始防守。路維見你減少反擊點就立刻換走中場Khedira換入Reus,加多個進攻點。但唔知點解Reus入黎之後竟然喺右路出現,唔係較擅長嘅左路?結果就同Kimmich、Muller等等撞晒車。
德國整場比賽有一半攻勢黎自右路,相對墨西哥有一半攻勢黎自其左路,即係話成場比賽淨係踢一邊。

之後墨西哥慢慢變做死守,塞死後場所有空間,德國亦換晒所有進攻球員上場。但德國求勝心切一對閘直情唔記得自己係防守球員,反而令墨西哥多咗反擊機會,多次人多打德國一對中堅,如果把握力好少少唔只入一球咁少。

一場比賽就將德國嘅問題show晒出黎,同組仲有南韓同瑞典,今場見墨西哥戰術奏效,一定照辦煮碗力求踢德國出局。路維真係要諗諗計可以點變...不過講到變大家一定瘋狂攞Sane出黎鞭屍...

如果喜歡我們的文章,請即分享到︰

標籤: 世界盃  墨西哥  德國  

留言


請按此登錄後留言。未成為會員? 立即註冊
    快捷鍵:←
    快捷鍵:→