曼聯專區小評:一早都話靴仔好重要!

曼聯專區 於 11/02/2019 發表 收藏文章
蘇B曼聯又贏一仗!當然大家都會注視入球已達11球嘅普巴,亦會對馬迪爾、福仔嘅表現流晒口水,不過唔好唔記得曼聯隊中總會有幾位無名英雄。好似當年史高斯控制比賽節奏,主宰中場;卡域克轉守為攻,突破僵局;而今時今日就有靴里拉為中場注入無窮動力,解放全部隊友嘅潛力!

畢竟人腳唔同,時代唔同,曼聯的無名英雄亦有唔同嘅風格、唔同嘅作用。先睇睇數字,你就會對靴里拉嘅風格有啲了解。曼聯近十場比賽,精神面貌可謂大大改變,當中最重要嘅係失球數字大減。自蘇B領軍之後,對比其他英超球隊同一時期嘅失球數字,曼聯嘅失球係最少嘅,而且當中又有2球係靴里拉不在陣中嘅時候被攻入嘅。由此可見,靴里拉強化咗曼聯嘅防守面,不過佢係點樣做到嘅呢?

咁就要睇另一個數據,就係靴里拉嘅走動同攔截工夫喇。如果計平均每場比賽,靴里拉成功攔截到對方傳送嘅數字係冠絕英超,首屈一指;而且佢跑動範圍極廣,差唔多整個中場都見得到佢嘅身影。計計數,佢對李城一役跑足12公里,比起其他英超球員跑10KM左右,靴里拉嘅勤力係一個頂級數字。換言之,佢就係一位滿場飛,專門打亂對手陣腳同節奏,猶如吊靴鬼一樣嘅難纏型中場。

而佢都好明白自己嘅工作:「我知馬迪同我再加上中堅嘅任務,就係無論腳上有無波在腳都好,都要封殺對手嘅攻擊。我估蘇斯克查好滿意我嘅表現,佢俾好多信心我。佢知我有無波在腳都可以幫到球隊,猶其係失去控球權時我可以好快搶返。佢應該係知道我有能力令隊友感覺更自由。」咁蘇B呢?佢都好明白靴里拉嘅長處:「佢同普巴、馬迪都有啲唔同,唔係以身體抗性為武器。但係佢不斷跑、不斷跑,贏到控球之後就打簡單足球,止此而已。」

其實有睇專區文章,筆者不下一次講過普巴係好需要隊友「抬轎」嘅人物,要佢分心去做防務、去照顧其他隊友,佢嘅能力就會大打折扣。不過你放生佢,任由佢發揮創意的話,絕對係一位極為危險嘅中場人物。所以有馬迪固本培元、靴里拉四圍製造混亂,令對手攻擊章法亂晒,普巴就可以好放心上去助攻,創造機會或者親自攻門。而防守方面,有別於之前只有一個馬迪做掩護,依家多一重靴里拉助守爭波,防守壓力亦都減輕唔少,間接減少失球。入波多咗,防守又好咗,自然贏波機會就大咗啦!
標籤: 靴里拉  

留言


請按此登錄後留言。未成為會員? 立即註冊
    快捷鍵:←
    快捷鍵:→