曼聯專區小評：心病還需「摩」藥醫

曼聯再失分已經唔係新鮮事，而就咁睇球隊嘅狀態，和波同輸波只會陸續有來。當中原因已經分析過唔少，但今日想講下精神層面，講下由摩連奴帶動嘅士氣同氣氛。對水晶宮前後摩連奴做嘅工夫，表面上係激將法，實際上係放負：「我哋講緊嘅係梳爾、馬迪爾、連格特、拉舒福特，年輕嘅潛力新星。但佢哋缺乏嘅係成熟，個人心智嘅成熟。我哋要man啲，要準備好迎戰生活，要少啲受保護。身邊人俾佢哋太多遷就，太多藉口，太多關懷。我哋叫呢啲做被寵壞的小屁孩。」

首先，成就「小屁孩」的人，最大「功勞」應該來自領隊。摩帥帶領球隊日子不短，點解教唔到啲徒子徒孫「man」啲？你數自己啲細嘅不是，係唔係間接講緊自己唔識教？而呢度，就引申咗另一個問題：摩連奴依家嘅教波方式，無論係戰術定係心戰上都已經係老舊一派，開始跟唔上時代巨輪。
心戰上，佢明顯係老派嘅想法：男人應該夠雄風夠擔當，所以佢偏愛嘅係馬迪、伊巴呢種球員，自己可以獨當一面，聽佢話之餘又可以話到事。唔係話唔好，但依家曼聯陣中就係唔多呢種球員，返而係90後小將多，「激將」呢隻藥用喺佢哋身上正正會出現不良反應。你見唔到高普、哥帥完全無大佬款，同球員打成一片？普捷天奴都係平易近人嘅大哥哥感覺？對住自己球員臭面插袋Cool到爆，已經過時喇。更何況福仔、連格特喺國家隊係跟住年輕有活力，又同年青人夾得到嘅修夫基，有比較之下，明顯地更加唔相信摩連奴嗰套。

戰術上原本摩連奴都有「後生」嘅一面，馬迪上季「變型防中」就可見一斑，防守時壓前打攔截，進攻時退後塞位，其實幾有前瞻性亦有創意。但今季佢死守已經唔work嘅防守性戰術，打打下竟然用返5、6年前嘅「莫天才九九八十一斬」，棄山神、馬迪爾、連格特擅長嘅地面攻勢不用，推唔再爆炸嘅爆炸頭去打前鋒，沉悶嘅戰術同沉悶嘅氣氛令球隊、球迷都死氣沉沉。
其實呢一刻，筆者已經對曼聯殺入前6不作期望，可能隨時要跌入下半版完成賽季添。如果摩連奴仲唔放低不必要的執著，繼續用古老石山嘅方式教曼聯，睇嚟失落歐聯資格再被辭退似乎係避無可避。但舊又未必唔好噃，舊酒新瓶，用曼聯引以為豪百多年嘅進攻靈魂，配以新式戰術同年輕球員，或者有機會可以中興曼聯皇朝亦未可知！