曼聯專區小評：止血為上，收起馬迪！ 精選

對曼城大敗一場對球迷而言已經唔意外，因為失波對今季曼聯而言已經係家常便飯。數字唔呃人，依家曼聯負1得失球差，1977年來第一次12場波之後錄得負得失球。上季成季只失28球，防守固若金湯，只比第一嘅曼城失多一球；今季至今已失21球，隨時未到半季已經輸夠上季全季失球數。由此可見，今季曼聯的全面崩潰，正正由後防開始。

你話人腳有咩唔同？中後場真係無咩唔同，但一切崩盤與摩帥「親生仔」馬迪大跌watt不無關係。上季馬迪截波準繩，防守有板有眼，打散極多對手嘅攻勢組織，仲不時連繫中前場球員；但今季佢好似換咗個人咁，騰雞甩波樣樣齊，面對面交波都可以交到對方腳下；而且反應大打折扣，轉身慢哂之餘又有少少心不在焉，有佢上陣猶如打少半個。你睇到我睇到，球員唔會睇唔到，防守方少緊半個人，史摩寧於是信心崩盤，傳染哂啲騰雞；再加上無咗馬迪去截停對手嘅傳送同組織，令敵將喺曼聯半場如入無人之境，自然失波多，失分多。唔係有普巴幫幫手轉守為攻，又唔係有馬迪爾、馬達「雙馬」個人能力搭救，跌落積分榜下半版都唔奇。
先唔好講曼聯陣容咁脆弱點算好，依家先止血，重回正軌先係最重要的任務！首先真係要試下唔再用馬迪打正選，搵個人替替防中位置。費蘭尼、費特、靴里拉，其實通通都唔太合格，但係筆者認為無咁出事嘅，可以用多啲靴里拉。費蘭尼用波太粗糙，同依家大紅嘅馬迪爾格格不入；費特樣樣有啲，但輸在未夾熟無默契；至於靴里拉雖然都係甩甩漏漏，但好大原因在於佢俾人雪得太耐，球賽觸覺好遲鈍。如果可以打返生少少靴里拉，佢既可以解放普巴，同馬達、馬迪爾嘅化學作用都會大少少，總比馬迪繼續拖後腿來得好。

戰術方面都要更為調整，既然防守不穩再打大巴戰術保守戰術已經唔work，不如打進取啲只留返史摩寧、連迪路夫打後少少，由楊格、梳爾開始力壓上前場，再由普巴、靴里拉、馬達指揮進攻供應馬迪爾、福仔，入多兩球追返失球數字可能仲好。仲有個盧卡古？算吧啦。