曼聯專區小評:渣古的錯?還是陣式的錯?

曼聯專區 於 29/10/2018 發表 收藏文章
從來曼聯嘅前鋒都唔易做,歷代紅魔鋒將真係少啲表現、跑少兩步都會成為被攻擊對象。強如瀟灑哥,入波又靚又多都要俾人彈懶散唔追波;朗尼、奧雲就更加係體無完膚,個個都好似係小朋友齊踢波咁,幼稚園級數一樣。而最新鞭撻目標,一定係陷入入球荒嘅盧卡古。

其實筆者對於近期盧卡古嘅表現都有懷疑,因為有佢在陣曼聯的攻勢就好唔流暢,散亂無章。但係對表現嘅質疑,唔代表等如對實力嘅質疑。有數據計過,盧卡古生涯至今大大小小比賽共267場共攻入129球,平均2場就入一球波;睇返佢加盟曼聯嘅數字其實都係咁上下,44場聯賽入20球,都係平均2場左右入一球,唔算係好多人口中嘅「大退步」。近5年來佢年年聯賽入球數都達雙位,更手執過百英超入球,實力點都唔可以稱得上係弱。所以問題出在球隊、戰術上幫唔幫到佢,而非去質疑佢嘅實力。

眾所周知,曼聯球迷又好,摩連奴都好,都要求「魔鋒」一樣要助攻助守,要全情投入參與每樣球場上嘅工作。上季馬迪表現出色,曼聯中後防穩陣無後顧之憂,盧卡古自然少啲防務責任,可以留喺前場等機會。但畫面一轉,今季球隊防線崩壞,人人疲於奔命幫手抵禦敵襲,於是盧卡古自己又返多咗中後場,打反擊時又唔夠人支援,表現自然大打折扣,陷入越打越差嘅惡性循環。再加上個人比賽節奏偏慢,令曼聯嘅進攻變得好易預計得到,亦好易瓦解得到。

睇返對愛華頓的半場好波,曼聯的優勢一字記之曰:快。無盧卡古拖慢節奏,再加上普巴都唔上腳決定打爽快波,行軍行雲流水,攻勢自然流暢,某程度上亦令福仔、馬迪爾快放嘅機會更多。前紅軍將士列納仔Jamie Redknapp賽後都有大讚呢個時候嘅曼聯,特別係對馬迪爾非常欣賞:「每次我見到馬迪爾,佢都有交出功課。你睇下今日嘅史密斯高文,面對帶波而來的馬迪爾,佢直情嚇到企定定唔識反應。佢擁有一切君臨英超嘅能力,擁有只屬於佢嘅足球天賦。」

如果你同筆者都有同感,認為曼聯適合打上半場嘅快攻模式,咁唔單止盧卡古未必適合呢個戰術,就連摩連奴嘅守勢足球亦都應該重新審視。不過打呢個模式嘅足球,最少我哋對前鋒嘅要求少咗啲啲,起碼唔會要佢哋逗到極深嘅陣地做防務,而連續無間嘅攻勢亦勢將逼得對手全力防守,減少後防嘅壓力,周日下半場狂撳嘅平安鐘嘅可以「撳少啲」。

標籤: 曼聯專區小評  盧卡古  

留言


請按此登錄後留言。未成為會員? 立即註冊
    快捷鍵:←
    快捷鍵:→