梳爾談重傷：我差啲截肢 精選

曼聯有唔少鐵漢，但梳爾呢一位現役鐵漢真係好好讚揚一下！經歷重創同摩連奴嘅大肆抨擊，睇嚟都無辦法擊倒呢位硬漢，今季表現仲非常sharp醒！不過原來有好多嘢佢都收埋收埋，特別係受傷之後嘅一段苦痛日子。

2015年9月對陣燕豪芬一役，墨西哥後衛希達摩蘭奴嘅侵犯令梳爾受到右邊小腿雙重骨折嘅重創。但呢個只係「表面徵狀」，梳爾日前談及受傷，原來情況可以更嚴重：「當時醫生有諗過用飛機送我返去，如果真係咁做我會真正失去右腳，因為當時我腳部有血栓問題。當時無人知我離開截肢如此的接近，而我自己都係半年後醫生先同我講先知道。我腳度開咗2大刀，俾醫生拎血栓出嚟。不過我依家感覺自己已經回復強壯，甚至比受傷前更強。」
相比摩連奴的「口術」，同傷患嘅糾纏先係梳爾真正的痛：「當時真係好難過。我從未同家人透露過我想放棄，呢件事真係好困難。受傷之後我咩都做唔到，非常沮喪，但我已經走出陰霾了。我嘅腳有好多併發症出現過，對我嘅事業係好大影響。同你講我無諗過掛靴係呃你嘅，但我身邊有好多人幫我，朋友、家人都好重要。」

而對梳爾而言，曼聯嘅心理專家更加係「重中之重」：「我當時主動去見佢，佢份人非常正面，我喺佢身上受益良多。至今我仲會搵佢，而且我哋已經成為好朋友。經歷呢件事之後，我感覺我真正由小朋友成長為大人。我戒咗好多蠢事唔再做，在場內外亦有好大轉變，我知我要做啲咩正確嘅事。我想為曼聯爭戰，留隊爭逐正選，證明自己嘅價值。我會在英軍做同樣的事，令修夫基點將時更加頭痛！我想被人視為世上最好嘅閘位球員，呢個夢想係我嘅動力泉源。」
唔得喇，睇到呢度連筆者都有少少眼濕濕…加油呀！努力呀！梳爾你要喺曼聯取得成功呀！