你還好嗎系列:娃娃臉逐歐霸夢!「我識嘅都係爵爺教嘅!」

曼聯專區 於 17/08/2018 發表 收藏文章
昨天歐霸盃第三圈外圍賽,挪威球隊莫迪3球擊敗喜伯年,得以繼續爭奪歐霸資格。而帶領莫迪嘅,正正係當年嘅「娃娃臉殺手」蘇B蘇斯克查!

講起蘇斯克查,大家最有印象當然係佢作為後備,含金量高到嚇人,1998年戰諾定咸森林一役後備上陣12分鐘已經轟入4球,成為一時佳話。不過依家嘅佢仍然出色,不過就係作為領隊方面。蘇B帶領嘅莫迪依家喺挪超排第4,而且努力打緊歐霸外圍賽,希望可以揚威歐洲舞台!而謙虛嘅佢,將自己嘅領軍能力都歸功恩師費格遜。
「爵爺教我唔好自滿,要保持水準。而我所有教波嘅知識,都係來自爵爺。你永遠都唔會知生命中有咩事會發生,不過呢一刻我會專心帶領球隊再奪挪超,並再次殺入歐洲賽舞台。我知我哋已經離此不遠了。」而提到爵爺5月時身體欠安,佢就話一直都有同佢聯絡:「初夏時爵爺有message我,話『唔好意思遲咗覆你!』佢就係咁熱心,會分派時間俾所有嘅人。我對陣完喜伯年都會同佢message傾下!」而呢場大勝,睇怕蘇B都會送俾爵爺賀佢早日好返!

至於莫迪,今仗贏完其實仲有好長嘅路,最少仲要打多一場歐霸附加賽,先有機會殺入分組賽,不過有蘇斯克查帶住,一眾球員應該會賣力奮戰落去!
小資訊:莫迪前鋒艾寧夏蘭特(E Braut Håland)今仗對喜伯年梅開二度,而呢位年僅18歲嘅「千禧年」小將除咗引起咗曼聯星探嘅注意,身世亦好傳奇,因為佢正正係Alf-Inge Håland,即係堅尼當年惡意踢傷嘅前曼城球員因格夏蘭特嘅囝囝…世界真係好細,係唔係?


艾寧夏蘭特

標籤: 蘇斯克查  

留言


請按此登錄後留言。未成為會員? 立即註冊
    快捷鍵:←
    快捷鍵:→