曼聯專區小評:金手套有苦自己知

曼聯專區 於 31/07/2018 發表 收藏文章
摩連奴喜歡泊大巴係人都知,睇數字就知上年曼聯的「防守」確係有水準,全季失28球僅比冠軍曼城失多一球,排英超第二;而迪基亞更加奪走金手套獎,可見對住曼聯要入波真係唔容易。之但係,紅魔鬼硬淨嘅主因係咩呢?

睇睇數字,就可以大約估到成個畫面。雖然失波唔多,但唔代表面對的攻勢唔多,上季只有6支球隊龍門救波數字多過曼聯。再睇細少少,整季曼聯面對147腳中框嘅攻門,但曼城只有88腳,利物浦都只有106腳。呢個數字意味住啲咩?就係曼聯嘅防守之所以鐵壁,迪基亞可以講係大功臣!試想想,曼城、利記進攻式壓逼打法,令對手單係防禦已經疲於奔命,難以組織攻勢,自然入波就比較少。當然唔能夠排除被對手打反擊嘅機會,但只要攻擊夠多,反擊次數亦會被壓抑到低點。

曼聯嘅情況有少少唔同,好多時係入咗波就縮後防線,等對手來攻,於是被對手攻門嘅次數就增加,中框數亦隨之而增加。或者你可以講,後衛「封線」做得好,其實中框都未必有威脅;加上有迪基亞的強大,亦造就上季嘅防守成績。不過見住己隊俾人力逼,不斷攻門,又難免令擁躉心急,總有一種「又守?隨時俾人追和噃!」嘅憂心。

更進一步嘅係,曼聯後防線其實已經有種慢慢衰老嘅感覺,依賴「老將」華倫西亞、楊格嘅時間一定會越來越少,唔可以旨意佢哋助攻咁多之餘,亦唔可以期望佢哋場場守得足。左路梳爾有必要慢慢上位,打出身價代替前輩楊格;而右路呢一環亦需要好好審視,新將達洛治擅長右閘位置,但能否慢慢替代華倫西亞尚要好好觀察。

當然,最有效嘅防守,當然要由中場開始。經歷今季世界盃,普巴應該知道自己打後半格嘅威力,同現時有傷在身嘅馬迪可以好好合作;或者同另一位hold波中場費特亦可以做到掩護,為迪基亞截多啲波,減少對手中框嘅攻門。中後場控制力增加,先可以俾空間一眾尖刀無後顧之憂咁爭取入球!

PS:截至7月31日的消息,《天空體育》指曼聯心儀嘅哈利馬古尼(Harry Maguire)決定留隊,唔會「入魔」。

標籤: 曼聯專區小評  迪基亞  

留言


請按此登錄後留言。未成為會員? 立即註冊
  • @michael@ 於 31/07/2018 評論 NO. 1

    又唔好講到防守好似好差靠晒神基亞(當然佢功勞不少),佢亦有多次造最佳觀眾

快捷鍵:←
快捷鍵:→