車曼大戰前夕:「靴夏戀」此情不再?

曼聯專區 於 23/02/2018 發表 收藏文章
靴里拉受傷,連摩連奴都話佢嘅傷可大可少,但可以肯定嘅係對車仔一戰唔會見到佢上陣…無錯,靴里拉、車路士,當然會令人諗起夏薩特!記得當年摩連奴「吊靴鬼」戰術,派遣靴里拉貼身招呼夏薩特,完全壓制夏神嘅突破能力成為一時佳話,甚至成為唔少hehe同人作品題材!家下無咗靴里拉,咁咪難以重彈舊調?

第一係,仲有無需要緊逼夏神呢?當年「吊靴鬼」戰術實行之時唔單止車路士如日方中,連夏神都著哂火,如果唔好好鉗制佢將會係非常危險的事情。於是就出現靴里拉一場比賽逼甩夏薩特控球權19次的極端戰術。過咗一年,雖然車路士已經不如上年咁得人驚,但夏薩特效率仍然驚人,近7場比賽入6球助攻2次,係車路士的一大尖刀。如此一來,再次令夏神失色看來對比賽形勢仍然係非常重要。

好喇,咁嘅情況下,我哋可以指望邊個呢?睇嚟答案再一次出人意表。有一位球員最近深得摩連奴的喜愛,佢先係大讚呢位球員嘅心態:「真係無咩人留意佢,可能因為佢唔搞突出髮型、唔整搞鬼紋身,無靚車又唔買靚錶,但我好明白佢可以做到啲咩。歐聯、聯賽、足總盃、聯賽盃佢都打過70至90分鐘比賽,佢呢種球員英格蘭國家隊入面甚至搵唔到!」最近對完西維爾,又讚佢打得出色,嚴防對手大將班尼加,守和居功不少。呢位球員就係只有21歲嘅麥湯米尼(Scott McTominay)!早前其實已經有講過,佢緊逼嘅打法對於打斷對手節奏係非常有效,史高斯、前曼聯預備組教頭華倫載斯都好睇好佢(詳見「普巴、爆炸頭受傷唔緊要!中場仲有人!」一文),無咗靴里拉「錫住」夏神,今仗都可以試用麥湯米尼充當大任。

只不過,用佢都有少少隱憂,一來夏神已經吃虧過,知道摩連奴的板斧,一定有準備如何破「吊靴鬼」;其次係講經驗麥湯米尼都唔及靴里拉,猶其係人釘人戰術好睇「熟練度」,只要夏神準備好一啲詭異嘅突破招數,隨時化解麥湯米尼嘅糾纏都唔一定。面對呢啲風險,摩帥仲會唔會選用「吊靴鬼」戰術呢?就算用,係唔係由麥湯米尼去擔任呢個角色?定係會用楊格、華西呢啲經驗同速度俱備嘅球員呢?可能真係要睇下戰術大師摩連奴點樣計劃喇!

標籤: 靴里拉  麥湯米尼  夏薩特  

留言


請按此登錄後留言。未成為會員? 立即註冊
    快捷鍵:←
    快捷鍵:→