連加特仲有效率過古天奴同卡尼？？ 精選

最近紅魔最紅，可能係一位令大家都有啲驚訝嘅連加特。不過對事唔對人，一眾曼迷其實好心水清，12月份最佳球員選舉，85%嘅票都去哂佢身上。之前嘅連加特猶如一隻電子小白兔一樣，以高速極盡竄擾敵人之能事，但係身在禁區的表現總係時好時壞。但係近呢幾個星期，佢好似連呢樣弱點都克服咗，同英超一眾薪高眼角高的球星可以爭一日之長短。

點解咁講？計哂助攻入波的話，原來每84分鐘就有一個入波關佢事，其效率比起古天奴、哈利卡尼仲高！咁當然啦，佢出場時間又比2人少，所以7入波4助攻嘅佢，整體數字上都係比古天奴(7入波6助攻)、哈利卡尼(18入波1助攻) 少嘅。只係佢為曼聯嘅貢獻，可以講係越來越明顯，甚至過去曼聯14個入波有一半都係佢入嘅，在盧卡古、馬迪爾同福仔無狀態時，佢真係幫到球隊唔少。而連加特嘅心得，同當年蘇B絕對相似：明白到身在大球會總有坐後備席的時候，要好好處理到自己心態，隨時準備好。

而摩連奴明顯睇實呢位「平靚正」青訓嘅成功人物：「作為年輕潛力股，同作為好球員是兩回事。年輕有潛質的球員需要跳過呢條線，有啲人得有啲人唔得，失敗的話就會變成好普通嘅球員。我認為連加格已經成功跨越呢條線，佢表現越來越穩定，適應力亦越來越高，更能閱讀球賽，能夠睇到同擅用球場所有空間，所有位置。佢嘅發展方向好正確。」

但另一個連加特爆發嘅原因，可能係因為無包袱。佢曾經咁講：「年少多好，因為年紀大之後人就只會關心贏波同埋贏獎盃。」當然呢一刻，作為曼聯球員當然要為勝仗努力，但係能力越大責任越大，呢個就點解大家會笑盧卡古有入球荒、亦會因為莫拉達對阿仙奴連番失機而嘲諷曼聯當初無入錯貨。當大家都開始對連加特有期望、身負重任之時，佢仲頂唔頂到壓力，繼續出色發揮呢？呢個可能就係另一個佢要面對嘅難關了。