馬達的正能量 足球的正能量

曼聯專區 於 02/01/2018 發表 收藏文章
如果你在看這篇文章,足以證明足球的威力不止於一種運動,而是溝通的橋樑,是人與人之間的一種連繫,當中可以有很多可能性。而曼聯球員馬達就認為足球絕對可以做好事,所以發起名為「Common Goal」的社區足球發展計劃,希望參加的球壇人事可以捐出1%的人工去幫助條件較差的年輕人,去追佢哋嘅足球夢。

至今,馬達嘅計劃已經得到35位球壇人士支持,當中包括曉姆斯、基亞連尼、香川真司、卡斯柏舒米高,甚至女足的雅歷絲摩根與及拉賓諾。而呢個跨17個國家嘅慈善壯舉,令英國《衛報》將馬達選為2017年度球員。喺common goal網頁,佢就提及自己呢個念頭嘅來源。

「今日我成立common goal,係想去改變世界,即使係好微小嘅改變都好。一切由某一刻開始。嗰一刻我在球場上,睇實湯馬士梅拿頭槌,皮球越過施治手頂,撞楣入咗網。當時我只記得球場上嘅聲音,自己一片空白。無他,嗰時係2012年歐聯決賽,車路士對拜仁嘅第83分鐘。幾秒後我在安聯球場中心,等拜仁球員慶祝完佢哋認為係絕殺嘅入球。即使精神強如杜奧巴,佢都表現出氣餒。我唔明,我哋努力都只係為咗打決賽,16強對拿玻里辛苦反勝、對巴塞10人苦戰…依家只能全功盡廢?我撳實杜奧巴膊頭同佢講,『睇下周圍,睇下我哋喺邊。唔好擔心,要有信念,要堅信。』」

「我keep住諗,命運要我哋贏。平時我好平靜,所以我估杜奧巴都感染到我嘅堅持,佢微笑住叫我哋再出發。我同佢都知,我哋只需要一個機會。5分鐘之後,我開角球,杜奧巴走去近柱接應。然後,大家都記得。戰和,殺入12碼最終贏波之後,我哋慶祝,我望住隊友,我睇到足球有幾美麗。捷克嘅門將,塞爾維亞、巴西嘅後衛,加納、尼日利亞、葡萄牙、西班牙同英國嘅中場,當然仲有科特迪瓦嘅強大前鋒。我哋來自不同國家,不同情況下加盟,講唔同嘅語言。有人係戰爭的受害者,亦有人曾經貧困,但我們都在這裡團結起來。足球就係我哋嘅common goal,可以令世界變得更好嘅一個共同目標。」所以佢希望可以將足球呢個共同語言,團結起更多嘅人,特別係需要幫助嘅人。

而接受《衛報》訪問時,馬達亦重申一次球員可以有超越自己嘅力量:「有時球員會畀人一種自私、係波牛嘅感覺,好似對社會無咩貢獻。但其實唔少人都低估球員對世界嘅影響力,除咗作為意見領袖嘅影響力之外,參與慈善工作的影響力亦被忽略。我深信,作為一個職業足球員,你有責任去關顧其他人,尤其係無法得到我哋同等機會嘅人。我哋做多啲,就會有更多年輕球員明白自己有幾咁幸運。」

其實身體嘅力量、對抗,真係人人差唔多。大家都係由球員組成,點解有啲球隊可以戰無不勝?有時未必係身體對抗贏,而係精神、意念嘅對壘分出高下。所以話,馬達呢重正面態度,係唔係值得我哋好好支持一下呢?

來源:
https://www.theplayerstribune.com/juan-mata-manchester-united-common-goal/
https://www.theguardian.com/football/2018/jan/01/guardian-footballer-of-the-year-2017-juan-mata

標籤: 馬達  

留言


請按此登錄後留言。未成為會員? 立即註冊
  • iamagoodboy 於 03/01/2018 評論 NO. 1

    Rex先生你有d離題喎—_—
    主題係馬達你就九成曲線自己醒

  • ztimtim 於 03/01/2018 評論 NO. 2

    _
    馬達是一個非常有球味的球員,又有拼劲,可惜身體單薄,速度慢

  • wombat 於 04/01/2018 評論 NO. 3

    利記可唔可以買馬達返嚟頂故仔

  • Fan Lau 於 04/01/2018 評論 NO. 4

    出口成文,馬達不愧為高學歷知識型球員

快捷鍵:←
快捷鍵:→