曼聯專區小評:一山不能藏二虎?

曼聯專區 於 22/11/2017 發表 收藏文章
上星期一戰普巴一復出即助攻又入波,曼聯好似又有返啲霸氣,令唔少曼迷都鬆一口氣。再加上伊巴比賽尾段復出,睇嚟今季曼聯的「真正形態」好似已經出現。只係伊巴同盧卡古兩大入球機器,對於曼聯嚟講係合作到定係搞破壞呢?

摩連奴就話,一山唔單止可以藏二虎,更可以雙虎同時出閘:「今季我哋成日打雙箭頭。已經發生好幾次,尤其係打三中堅時兩閘可以上中場幫手,令雙箭頭打法變得可行。其實季前熱身我哋已經有呢個打算,要球員熟習打三中堅,最終就係要佢哋(指伊巴、盧卡古)可以一同作戰。可以係伊巴拍盧卡古,可以係只得伊巴、只得盧卡古,甚至係2個都無。我要嘅係選擇,依家我有好多選擇。」

但係實情係,即使上星期紐卡素一役伊巴、盧卡古同場,都唔見得真係一個「雙箭頭」陣式,因為當時好明顯盧卡古移到右邊鋒的位置,而出名first touch麻麻嘅佢,甚至連好好帶波殺入禁區都有困難。而各路名家都指,呢兩位球員都只係適合打前鋒,要好好合作唔係唔得,但一定有難度。比拿美就如此評論:「伊巴咁有性格,佢一定係最受人注目,只要行入更衣室都有氣牆畀人感覺到。我估盧卡古一定都好敬重伊巴,但問題係當所有注意力都在他身上,對其他前鋒係一定有影響。因為打得前鋒,某程度上要有少少自私先得,因為只有為自己入波、為球隊入波,先可以建立自信,先可以為球隊贏波。」言下之意,兩個球員一同出陣的話,爭食固然影響球隊,但過份禮讓又會令自己信心不足,即係下把的盧卡古隨時無哂銳利鋒芒,絕對唔係好事。

連加歷查都認為一山不能藏二虎:「我唔認為佢哋可以打雙箭頭。大家都話自己好期待伊巴回歸,而事實係佢一出嚟真係令大家好震驚,只要佢入返波,變得更有信心的話,以前的伊巴一定會返嚟。只係咁,我唔知摩連奴有無落指示,但係伊巴一落場就好似去叫盧卡古打右翼,最終佢都真係照做。」

無錯,無人可以擋到獅子。依家唔知盧卡古得唔得,但係身在PSG時伊巴已經「邊緣化」咗卡雲尼。當年都係雙鋒在陣,但PSG教頭決定將卡雲尼發放右邊路,甚至令佢感到難以適應,心情大大低落。呢個畫面,正正喺盧卡古身上睇得返。可幸當年伊巴仲係33,卡雲尼就27,幾年內都仲可以見到兩虎爭逐;但依家伊巴已經36,盧卡古只係24,可以想像曼聯未來的主力前鋒一定係盧卡古,即使真係被邊緣化,都只係一年半載的事情;而呢位年輕球員仲可以好好向伊巴學習,未至於對更衣室有好大影響。只係可以預期嘅係,好似摩帥口中伊巴謙盧卡古同場獻技的情況未必真係好多,反而係福仔、馬迪爾兩位年紀更輕的球員做下把,伙拍兩位「大人物」的機會仲多。

留言


請按此登錄後留言。未成為會員? 立即註冊
  • @michael@ 於 24/11/2017 評論 NO. 1

    擔心呢樣?不如擔心褔仔,馬仔好過啦

快捷鍵:←
快捷鍵:→