季初論鋒 精選

當你連贏2場4:0，意見一定係兩極化：一係就越來越樂觀，講到之後無得輸咁；一係就話少年你太年輕喇！贏兩場算係咩。而我哋嘅摩連奴好明顯就係傾向後者，因為佢接受訪問時竟然話，依家佢想見到嘅係曼聯「先輸波」：「我依家當然對球隊有好表現感到開心，球員真係畀到信心我。只係我唔會忘記上季我都係以6分開始賽季，最終我哋都只得第6。這就是足球，2連勝唔係天堂，2連敗都唔係世界末日。只不過我依家想睇下球隊先失波的話會表現出咩精神面貌。依家係順風順水，不過球季流流長唔可能一直都『直上公路』，總會有路障、總會有困難。我哋點都要有準備，先失波的話就係另一個情況，畀我睇到球員會點去求變。就等下有無賽事畀我哋戰至最後一刻啦。」
其實依家隊波都唔見得真係順風順水，好似福仔打咗場好波之後，今場就有少少跌watt，太急於表現自己，獨食咗少少；另外亦有時太過有信心，好似單刀嗰球咁。可見摩帥嘅諗法不無道理，贏得太順就會令球員太過自信，鬆懈咗。摩連奴話，正正因為福仔係一個好球員，又快又有威脅，所以成日都畀對手凍結，影響發揮咁話。不過筆者就認為，球隊表現好都係一個原因，令年輕球員有啲過份樂觀。

至於另一位年紀都唔大嘅球員，就係盧卡古喇。人人都有改進空間，佢又點會無。重炮手哈索賓基步大力雄，由佢嚟評論盧卡古合適不過：「佢面對龍門好過背對龍門，因為佢有足夠冷靜去致對手於死地。我認為佢唔可以忘記呢一點，要將自己長處盡量發揮。好多人話要佢多啲返中場幫手，我唔係咁睇。中場都有普巴、馬達、米仔，點解要分散自己力量去做不必要嘅工作？不過佢都有弱點，佢無球在腳時唔會預估形勢，到有事發生先反應，太慢喇。曼聯其實仲要多一位前鋒，一個同盧卡古唔同嘅前鋒。」呢樣嘢就要同拜利學下，好似佢入嗰球就係因為估到個波有機會唔入所以前衝，比著盧卡古可能會企定定。
而哈索賓基口中同盧卡古唔同嘅前鋒，即係要背對龍門威脅仲大、預視球賽能力比佢強，咁可能大家都估到係邊個：伊巴！有留意曼聯新聞嘅你，一定睇過伊巴最新上載嘅連環腳踢沙包片段啦？好得7788嘅佢，連ESPN都收到消息有可能今個星期以自由身「再度」加盟曼聯！到時幾個世界級前鋒齊齊分擔幾條戰線，應該無上季咁辛苦喇掛？


https://www.youtube.com/watch?v=WGUba1HEKRE