曼聯專區小評:3中堅解放「新黑雙煞」

曼聯專區 於 21/07/2017 發表 收藏文章
今日摩連奴實現之前講過嘅說話,打一次雙箭頭畀大家睇,而結果就係盧卡古、拉舒福特「新黑雙煞」一人一球,將未係幾入局嘅曼城擊敗。就等我哋睇下,今季呢個係唔係摩連奴主要戰術?

不過與其問會唔會,應該話摩帥根本一開始就打算轉陣打雙前鋒陣式。上季打單箭頭,伊巴一個人單打獨鬥,面對弱旅鐵桶之陣好難突破,令曼聯好多時和波失分。為咗對付呢個問題,摩連奴明顯想加強攻力。一開始就連筆者都認為佢係想用盧卡古嘅身體抗性打單箭頭,做「加強版伊巴」,不過睇季前熱身賽2場比賽都係用雙箭頭陣式,就知摩帥係想以人多蝦人少。第一場對銀河,上半場馬達、福仔打前,下半場馬迪爾、盧卡古打前,都係雙箭頭。而今仗就更加係福仔加盧卡古,兩個都快、一個仲要大大份。目標係咩?曼聯今仗第二球就係好例子,米希達利恩中路推進,盧卡古、福仔一人一邊左右鬥哨,對於對手防守球員嚟講真係好恐怖,2個都快、好難mark,仲要唔知交畀邊個。呢個就係摩帥下季嘅攻擊概念,要令對手後衛進退兩難。

但係前面用多個人,咁中場、後衛犧牲邊個好呢?無錯,答案就在3中堅陣式身上。計計埋埋,家下曼聯已經有8個中堅,人數上真係唔到你唔驚。史摩寧、鍾斯、白蘭特、拜利、盧祖不在話下,仲有新將連迪路夫、小將杜安沙比、科素文沙,因為打3中堅你一定要有咁上下中堅人腳揀先得,依家傷一兩個,或者輪換都好,人腳都夠。放棄一個後衛、放棄閘位,左右側擊同防守,就由楊格、華西、達美安、梳爾等人幫手啦。

於是352陣式當中,就剩返中間3人,普巴、靴里拉、卡域克、米希達利恩、馬達都可以勝任。不過,如果想再進一步,就要用埋馬迪或者艾歷迪亞。之前筆者《下個係馬迪?定係艾歷迪亞?》文中都有提過,普捷天奴已經打造艾歷迪亞成為352陣式中重要嘅指揮官,球隊要進攻時佢可以回防做中堅補位,以防球隊突然失波被反擊擊潰;球隊主守、控球權在對方手上時佢就係攔截型中場,係轉守為攻嘅一個轉捩點。馬迪呢方面可能未必夠艾歷迪亞好,不過身高同精力搭救,亦可以成為中場、中堅的一個緩衝球員。

呢個就係摩帥心目中嘅352陣式,亦係343陣式嘅改變同埋延續。上一年干地起用343陣式獲得重大成功,而摩連奴就以其人之道還施其人之身,聯賽次回合對陣車仔時正正用343迎擊,最終成就「迎頭痛擊」,同熱刺一樣雙雙以同樣陣式氣走車仔。而呢個成功,應該就係依家曼聯進攻陣式嘅濫觴。如果真係用熟到呢個雙箭頭陣,下年曼聯入波數字可期!

留言


請按此登錄後留言。未成為會員? 立即註冊
  • Wo Yuen 於 21/07/2017 評論 NO. 1

    今年一定得

    今年一定得

  • Paul Sun 於 21/07/2017 評論 NO. 2

    後費蛇時代 年年都話得 有邊年真係得

  • tinchi3721 於 21/07/2017 評論 NO. 3

    摩佬定律第2年😏😏

  • Marcus22 於 21/07/2017 評論 NO. 4

    點解我睇黎睇去都係451 or 442 ? 你點睇到352 ?

快捷鍵:←
快捷鍵:→