盧卡古要多謝伊巴，仲要多謝「佢」？ 精選

成就盧卡古嘅，其實有好多人，當中包括咗伊巴謙莫域。著上9號波衫嘅盧卡古就咁講：「我著咩號碼我通常都係問我媽媽先，之前我著10號係因為媽媽10月生日。但依家我著9號，係因為我認同我作為前鋒呢個身份。我有問過伊巴先架，佢答我無問題。我好想多謝佢，因為佢畀我著9號。」

而成就盧卡古，仲有2個人：莫拉達同埋拿卡錫迪。你可能會問，莫拉達都叫做係曼聯目標之一，點解「新兵」拿卡錫迪又關事？ESPN就爆料，原來一開始拿卡錫迪都係曼聯目標之一，只不過曼聯好快就認為佢唔啱用，因為一來唔確定佢喺英超表現會係點；二來佢身體抗性唔強，唔啱曼聯依家嘅戰術，而最大問題係佢大賽表現唔見得好。3個原因加埋之後，曼聯早早就放棄咗收購呢位球員。
睇返拒絕拿卡錫迪嘅原因，就知盧卡古為何跑贏：佢撞得，一個人支撐成條攻擊線絕無問題。而更重要係，自12/13球季至今，佢已經攻入85球，同期只有阿古路嘅99球比佢多，連哈利卡尼嘅78球都要輸個馬鼻。由此可見，佢已經證明自己喺英超嘅入球能力，而且只有24歲嘅佢剛剛進入足球員生涯嘅黃金時間，接下來幾年只要保持到水準一季入多過廿球，對於曼聯而言已經係一位不可多得嘅重要球員。可能大家會懷疑佢係唔係大賽球員，但係愛華頓嘅大戰，同曼聯嘅大戰不可同日而喻；再加上隊友唔同，化學作用都可能唔同。依家睇佢對big 6，57場上陣比賽只係入過15球、取得9勝，成績確係麻麻，但要證明佢係唔係真係大賽球員，可能要一年後睇返呢個數據作對比先可以下結論喇。