曼聯專區小評:比列錫成魔傳聞?唔好啦...

曼聯專區 於 29/05/2017 發表 收藏文章
摩帥話想快刀斬亂麻,喺艾活華8月放假之前完成所有轉會事宜,難免又令到各方傳媒諗下下個成魔係邊個。而依家傳得最熱嘅,係國米飛翼比列錫。

大家對呢位克羅地亞球員有無印象呢?佢打國米2季共計交出16個助攻,係一位好傳統打翼嘅球員,擅長一對一過人,盤扭技術不俗之餘,亦有一定身體對抗性。而另一個佢打翼嘅特別之處,就係佢係雙槍將,左右腳都得,所以面對對手後衛就有更多方式可以突破。而去到對方後半場,有住傳統打翼風格嘅比列錫就傾向「向外走」,拉開球場空位,盡用球場闊度,變相令佢無咩直接攻門,多做穿針引線嘅功夫。

而佢最得到摩帥的歡心,好可能係佢嘅防守能力。因為都擅長逼搶,比列錫被一啲外媒形容為「防翼」,有一定防守能力之餘仲好識無波走位,力逼對手入去不利嘅位置。而且佢都幾勤力,攻完一輪都會不惜氣力回防。摩帥心儀攻守兼備球員已經係眾所周知嘅事,當年愛將馬迪係一例,就連當年馬達之所以喺車仔不受摩帥喜愛,好多人估計都係因為佢「懶」,回防乏力之故。

而傳佢去曼聯的原因,根據ESPN嘅講法,係因為國米想買「J洛」占士洛迪古斯,急需資金,所以叫價5500萬歐元賣比列錫。只不過,曼聯好似企硬只肯畀4000萬歐元,所以雙方其實暫時膠著,未有共識。
老老實實,筆者對於比列錫只有一個評語,就係:無需要。左翼,我哋有馬迪爾、拉舒福特,必要時仲可以用達美安。右翼,我哋有啱啱續約嘅華倫、又有米希達利恩,必要時仲可以用馬達。講防守力,華倫、達美安絕對夠,再加上摩帥的陣式都唔係好用得著左右翼,反而係著重左右閘的攻守兼備,如此一來,比列錫呢位傳統翼鋒,唔單止無咩特別幫到球隊,要佢轉型打其他位置亦唔容易,咁嘅情況下有無需要買佢呢?

反而係前鋒,如果用多啲錢去說基沙文,甚至係要多幾個回歸派好似小豆、米高堅尼,係唔係比較實用少少呢?

source:
ESPN
標籤: 曼聯專區小評  比列錫  

留言


請按此登錄後留言。未成為會員? 立即註冊
  • Tsang Jimmy 於 29/05/2017 評論 NO. 1

    如果呢隻翼咁有用,佢代替馬迪爾,或釋放舒拉福特打前仲好

  • Li Wing Kin Alfred 於 29/05/2017 評論 NO. 2

    寧願佢比1億買基沙文

  • raymond sze 於 29/05/2017 評論 NO. 3

    但係馬迪爾同福仔都唔係正宗左翼 比列錫黎可以令邊路更加有威脅 最重要係佢係正宗翼鋒

  • 閒雲野鶴 於 29/05/2017 評論 NO. 4

    佢令我諗起幾位摩連奴嘅舊將: 洛賓、彭迪夫同迪馬利亞。

  • ztimtim 於 29/05/2017 評論 NO. 5

    安排(訓練)佢打右

  • @michael@ 於 29/05/2017 評論 NO. 6

    摩佬真係想揾快翼嘅,可以試下保特,曼聯忠實fans,免簽費,速度有保證。😂

快捷鍵:←
快捷鍵:→