曼聯專區小評:基沙文是下季重心收購目標?

曼聯專區 於 24/01/2017 發表 收藏文章
今季摩連奴的收購明顯地令曼聯有所改變,4位新將入面3個都充當曼聯的入波關鍵,普巴入4球、米希達利恩下半季先獲重用,不過都已經取得2個入球,表現對辦。只不過,要講今季曼聯核心,一定要數伊巴,因為佢14球入波比起次席射手普巴、馬達都多10球。佢浪費機會咩?你又真係奈佢唔何,因為真係曼聯眾將齊心合力都係想將波交到佢腳下,由呢位天生殺手埋齋。只不過,之前筆者都講過,佢同卡域克都貴為曼聯35歲的球員,任其體能再超人、天資再離譜,都總有退下來的一日。隊中有馬迪爾、有拉舒福特,當然都係可造之材,只不過講到穩定交貨、持續有入波,佢哋都要仲要啲時間。所以,全世界都認為曼聯吼實基沙文係理所當然。

就連紅軍的名宿羅蘭遜都承認,基沙文絕對有機會「成魔」,只係唔會喺一月發生而已:「我唔知摩連奴會在一月有咩動作,不過佢隊波開始成形,而且板凳深度都好夠。我知道曼聯對基沙文好有興趣,只係馬體會無必要賣佢,季尾都仲有可能。始終佢哋要打歐聯,放走基沙文無好處。而基沙文自己亦無好處,放棄歐聯打歐霸對佢而言係無意思的。」然而,如果曼聯真係可以保得住頭四,又或者歐霸成功奪標行另一條路返歐聯,毫無疑問會增加基沙文投魔的意欲。再加上,睇數字而言佢對曼聯真係一個好啱用嘅球員。

首先係入波能力,佢為馬體會爭戰2年半,已經為球會攻入52球,比同期的尼馬51球、賓施馬的44球都多。要數勁過佢嘅,只有3個人:C朗、美斯同蘇亞雷斯。而且佢一直都進步緊,由10/11球季平均一場波只有0.25個助攻或者入波,慢慢增加到近年平均一場波有0.75個助攻或入波。而且呢個唔係虛火,唔似迪比咁維持唔到,因為基沙文已經連續3年取得呢個咁靚嘅數字喇。

而佢嘅作戰方式,亦對曼聯好有幫助。如果曼聯急需一位可以替代伊巴的前鋒球員,咁呢個球員入球觸覺要高、而且要有多種攻門板斧,始終作為一個單前鋒,最好由頭到腳都識入波,因為全程畀人緊逼係無容置疑,有機會一定要把握到,用咩方法都好。而基沙文正正就係有唔少攻門方式嘅球員。要同1.95米高嘅伊巴比身高真係唔易,得1.76米高嘅基沙文矮就真係矮一截,不過勝在頂上功夫都唔差,對切爾達時就入過2個頭槌,可見佢對頭頂入波都有自己一套心得。再加上佢門前功夫有、中遠距離射門亦得,傳送、保護皮球能力亦佳,絕對充滿了單前頭需要的能力。而原本打翼嘅佢,速度更加唔需要為佢擔心。

其實,畀我係馬體會的話就一定唔賣佢,始終頭先數過西甲過去幾年的射手中,最強6人入面有5個都身在巴塞、皇馬,即係話馬體會呢2年入波好都幾依賴基沙文。不過話又講返轉頭,如果基沙文好想去曼聯又點睇呢?眾所周知基沙文偶像就係曼聯7號仔碧咸,佢著7號兼喜穿長袖波衫都係想要學萬人迷,如果真係留返件有陣陣碧咸味嘅7號曼聯波衫畀佢,要叫得郁佢唔係奇事。再加上曼聯陣中有普巴、馬迪爾呢啲法兵在陣,同佢關係非常唔錯,落下咀頭之下決心「成魔」嘅機會比起轉投其他球會都大。佢係唔係就係下季曼聯重心收購之一?大家等睇戲啦!
「喂喂,曼聯去唔去得過啫?」
標籤: 曼聯專區小評  基沙文  

留言


請按此登錄後留言。未成為會員? 立即註冊
  • Wo Yuen 於 24/01/2017 評論 NO. 1

    大把錢,盡買

  • kinfung 於 24/01/2017 評論 NO. 2

    柒摩:基沙文能成頂級中堅

  • 李奧152 於 25/01/2017 評論 NO. 3

    總入球33球,比前五隊最少低10球!入球率少!始終都係差!伊巴真心勁但單靠一人破門始終隱憂!普巴背負身價,卻不專注足球,咁既表視如果五千萬都算,但成一億就nonono啦!另外買球星咪玩喇咁既形勢到最後諗下點留住啲星好過喇,迪迪仔一走,一定係中型型!

快捷鍵:←
快捷鍵:→