摩帥：一朝天子一朝臣 馬達喺曼聯唔駛騰 精選

其實一開始傳摩連奴有機會入主曼聯，大家都好擔心馬達，仲有唔少球迷講笑咁話雲帥麾下最有鬥心就係馬達，因為雲高爾的下台等如馬達的惡夢。不過馬達唔單止無畀人賣走，仲打出水準，挑戰開季以來都打10號位的朗尼正選位置。摩帥就同大家講，呢個情況絕唔奇怪。

佢咁講：「首先要搞清楚，當年我無『賣』走佢。我嘅工作唔係買賣，而係教波、在足球場上工作，同埋喺轉會上面畀建議高層。第二大家要搞清楚，當年係馬達自己要走，如果有球員想走，你都一定要好好考慮。第三大家都要搞清楚，我喺車仔有嘅人腳、目標係一回事，我喺曼聯有嘅人腳、目標係另一回事，情況係完全唔一樣。所以，車路士的馬達同曼聯的馬達係絕不能混為一談。依家曼聯唔似14/15年的車路士咁，全隊都係身體抗性強的隊員，可以用防守性戰術奪得冠軍。我麾下曼聯的打法會好唔同，所以馬達好適合呢一隊曼聯。我需要有佢咁嘅質素，呢隊球隊係佢可以紮根嘅地方。」
就以李城一戰的記者會中摩帥所言一比較，就知馬達在隊中功用如何。當時摩帥話，佢需要2個快速攻擊球員，再以馬達在當中作連繫功夫。呢2個球員就係拉舒福特同埋連格特。而事實證明，有馬達駁一駁腳，對手估曼聯的進攻方式就困難咗，而佢入波嘅時候就係同連格特、普巴精妙入楔、小組短傳的結果。所以短時間內，馬達應該都仲有運行，除非摩帥轉變球隊風格泊紅色大巴啦！不過以曼聯的傳統、一眾名宿的加持之下，睇嚟摩帥都會繼續打進攻足球，咁嘅話馬達同埋馬達粉絲們就真係可以安心喇！