摩帥：歐霸影響曼聯爭戰英超 精選

曼聯即將參加本季第一仗歐霸賽事，喺記者會中摩連奴講到歐霸真係幾影響英超嘅比賽，不過既然都身在當中，曼聯都一定會全力爭戰咁話！其實歐霸係點樣樣影響曼聯嘅比賽呢？

摩帥咁講：「佢真係令我哋嘅情況變得困難。無錯有時係有可能喺星期一比賽，不過我哋好似從來都無呢個特權。所以我哋星期四要打歐霸，但係就唔可以打星期一嘅英超，變相少咗一日休息。我明白係無支援，好似接下來我哋就要一星期連戰利物浦、費倫巴治同車路士。係就係有星期一打比賽嘅禮物畀咗我哋，不過唔係之前而係之後，咁有咩用？我哋10月17日星期一戰利物浦，星期四(10月20日)就要應付費倫巴治，然後星期日(10月23日)就要同車路士比賽。歐霸唔係曼聯想要打嘅比賽，唔係我想打、亦唔係球員想打。只係我哋已經入咗呢個盃賽，我哋就要尊重佢，贏佢返嚟。說易行難，我哋迎接聽日嘅比賽，心情係有啲複雜嘅。呢場比賽好重要，我哋要搵到動力去做到最好，我自己呢就已經準備好。我希望，亦會嘗試將我嘅動力轉移去球員身上，因為我知唔係個個球員都希望爭戰歐霸。問題係既然無歐聯打，我哋就要喺已有嘅比賽入面做好佢。」
而摩帥亦透露咗比賽人腳，佢會畀朗尼休息一下，亦會畀梳爾唞下。咁意味住拉舒福特同埋盧祖都會有機會上陣。