錢！全部都係錢！ 精選

轉會窗就咁就完結咗，曼聯成功收購「四大天王」拜利、伊巴、米希達利恩同埋普巴，賬面上拜利3000萬鎊、米希達利恩2600萬鎊，連埋8900萬鎊嘅普巴，曼聯主要收購就用咗1億4500萬鎊，你話多定少呢？比起上年曼聯用1億2000萬係就係多咗少少嘅，不過上年有6位球員，馬迪爾、迪比2位「標王」各自身價3600萬鎊同3100萬鎊，老老實實、加加埋埋都唔夠買一個普巴，今季啲球員睇轉會費就真係貴過上年嘅。不過更為重要嘅係，睇轉會費其實只係冰山一角，因為魔鬼盡在細節裡！

點解咁講？好簡單，用伊巴謙莫域嚟講，自由身投曼聯嘅佢係唔係真係一啲cost都無？當然唔係！計完數，其實佢駛咗曼聯最少1100萬鎊架！原因好簡單，球員都係人，都係要：出糧！以伊巴嚟講，佢一年合約加22萬鎊周薪，簡單乘數之下就會計到1100萬鎊一年喇。咁當然啦，佢嘅人工都唔及米希達利恩轉會費一半，睇落應該係抵啲嘅點都！
事實就係，米希達利恩整個轉會確實係貴過伊巴，不過都唔係貴得好多咋噃，因為佢人工平啲之餘，份約又長啲。如果真係要系統啲計，計球員一年用咗曼聯幾錢的話，應該就要將轉會費除合約年期，再加上一年薪金，咁就係比較易明嘅數喇！以米希達利恩嚟講，佢4年合約加上18萬鎊周薪，計完一年其實用咗曼聯1800萬鎊！對於一位上屆喺德甲入波助攻加加埋埋有成50球嘅球員而言，呢個投資都值得一搏嘅！如果用其他球會做例子，利物浦今屆「標王」沙迪奧文尼都用紅軍1200萬鎊一年、史東斯去曼城用人哋1400萬鎊一年，米希達利恩同伊巴係就係貴啲，不過都唔係貴好多嘅。

當然，曼聯最大食嗰個其實未出現，佢就係普巴喇！佢五年約，8900萬鎊、薪金僅次於伊巴，不過都有成21萬鎊周薪，除除埋埋，佢一年就要咗球會2800萬鎊！呢個數仲要係保守估計，因為佢仲要有獎金呀、肖像權使用費呀、佢個agent fee呀，估計一星期曼聯就要畀成6萬鎊，隨時加多300萬鎊一年架！
唔好計到咁細，單係佢8900萬鎊轉會費其實都好嚇人，BBC就提過一啲好有趣嘅對比數字喇！大家又不妨估下？

1. C朗對腳嘅保險金貴定係普巴貴？
2. 祖記球場貴定普巴貴？
3. 曼市地標、商住兩用大廈Beetham Tower貴定普巴貴？
4. 咁，伊巴咁多年嚟嘅總轉會費貴，定係普巴呢「一次性」駛費貴？
5. 超超超超級貴金屬「鉲」4克！邊個貴？
6. 咁比起上季成隊李城呢？
7. 咁朗尼買唔買得起普巴呢？用自己錢噃！

答案在下頁！