曼聯專區小評:爵爺魂 VS 摩佬志

曼聯專區 於 26/08/2016 發表 收藏文章
呢條題大家都應該估到同曼聯下一個對手好有關係,因為侯城一個月前主帥布魯士突然辭任,大任就落喺前曼聯副帥費蘭(Mike Phelan)身上。佢暫時仍然未係正式主帥,只係看守領隊之職,不過暫時表現都令人看好,因為至今英超兩戰全勝的4隊隊伍當中,就有費蘭麾下嘅侯城份。就連朗尼都表示好支持呢位代主帥,亦提出佢根本就係繼承咗爵爺的領軍方式:「佢跟咗爵爺咁耐,大家都有眼見。侯城表現好好,如果費蘭可以出任全職領隊,佢會做得更好。」其實就連爵爺自己都好支持費蘭,當莫耶斯決定不再起用費蘭,就被爵爺批評過呢個決定。簡單啲講,佢就係爵爺的後繼者之一,即係…擁有爵爺魂的男人!

而曼聯呢?經過3年嘅下滑,呢隊曼聯可以話係無咩爵爺影子,自從莫帥開始,已經係橫傳橫傳再橫傳,交後交後再交後。去到雲高爾年代,情況無咩改變嘅原因係佢「控球至上」,寧要穩陣不要冒險,於是產生控球過70%,攻門不足10次的尷尬情況。當然,英超已經同大家證明咗,羸咗控球唔一定羸到場波,有隊波80%控球、26腳攻門最終都係輸2蛋(你知邊隊嘅),就係最好的例子。如果仲用緊莫帥、雲帥的方針,筆者其實有啲驚驚哋,面對擁有爵爺魂的男人,軟腳蟹打法絕對係有危機嘅。

不過…雖然時間唔長,但呢一刻主宰曼聯嘅唔再係莫帥、雲帥,而係摩連奴。大家都估到會有改變,只係估唔到改變來得如此有效、快速,就連睇控球已經知曼聯的精神面貌唔同哂。對李城一戰,曼聯係58%控球率;對般尼茅夫,53%;對修咸頓更跌至43%。放棄爭搶控球權,換嚟嘅係攻擊型嘅足球,由得你控,我喺必要時先攔截,令你攻門唔中龍先係防守目標。對住聖徒43%控球,偏偏就係將對手嘅攻門中龍數減到得返1球。攻擊呢?放棄爭控球,唔代表放棄進攻,摩連奴嘅搶截由中前場已經開始,往往希望盡早逼甩對手腳下球就反守為攻,呢個時候就激發咗唔少球員嘅能力,好似「牙牙咋咋」嘅費蘭尼就多咗好多趁對手未攞定個波就偷走人哋控球嘅畫面。同時間,大家亦明白點解用天價都要買普巴返嚟,因為佢嘅意志、逼搶,全場飛的體力性打法,對於摩連奴呢個攻擊系統而言正正就係攻勢的起點。唔駛講,伊巴怪腳偷波亦係好適合呢個體制,往往能夠轉化對手的攻勢為自己的機會。簡單啲講,依家呢隊曼聯已經有摩佬意志,仲要唔係當年擺大巴嘅摩帥風格,而係一種壓逼性的進取性打法。

2隊都係適應緊新領隊的風格,不過睇嚟2隊都適應得幾好,咁周末爵爺魂 VS 摩佬志嘅大戰,究竟係戰術之爭,定係球員個人能力嘅鬥法呢?筆者就認為計計埋埋,點都係曼聯球員的質素佔先啲,睇好紅魔羸啦梗係!




標籤: 費蘭  摩連奴  

留言


請按此登錄後留言。未成為會員? 立即註冊
  • L Lo Pang 於 26/08/2016 評論 NO. 1

    期待費蘭會回歸曼聯

快捷鍵:←
快捷鍵:→