曼聯專區小評：解構米希達利恩

4大新將入面，暫時未係好企得住腳嘅係上季多蒙特助攻王米希達利恩，睇幾場波摩帥都係用佢換入馬達，睇佢身體語言好似唔係幾有信心，好似有啲迷咁。佢嘅前隊友根度簡就講過，其實米希達利恩好慢熱，係一個好需要時間去建立信心嘅人：「米希達利恩喺多蒙特3年，老老實實，頭2年佢都唔太好過。佢係一個好需要自信嘅球員，要個個星期落場踢、去證明自己有能力，佢先會越來越進步。呢一刻佢唔太成功，於是就影響佢適應新生活。毫無疑問佢依家係有問題，不過你睇佢上年嘅叻叻表現，我可以話佢係我哋當中最重要的球員之一。如果佢可以返到呢個信心水平，佢就可以為曼聯帶來好大的衝擊，成為一個關鍵人物。」
其實米希達利恩出生自足球世家，仲有少少悲劇色彩添。佢爸爸係一位前鋒，職業生涯中上陣三百幾場賽事攻入過百幾球；佢媽媽係亞美尼亞足協的職員；更有個妹妹幫緊歐洲足協打工，成家人都同足球有關。佢好受爸爸影響，只不過佢已經無辦法再同爸爸一齊踢波，因為「米爸」33歲時患上腦癌已經撒手塵寰，當然米希達利恩仍然好掛住爸爸啦：「佢係我嘅帶領者，係我嘅動力來源，我細細個時佢已經係職業球員，我總係幻想可以同佢在訓練場上一齊操練。我好希望可以繼承佢嘅工作，繼承佢作為一個球員的夢想，雖然佢嘅離世好可惜，不過呢個就係生命，我哋都要繼續生活。我盡一切努力令佢感到自豪，希望佢在天之靈都會睇得到啦。我成日都睇佢比賽啲片段，不過足球已經改變好多，我依家睇都只係回顧下佢嘅打法，無辦法用返喺場上。其實都幾傷心，我一直認為佢會支持我、鼓勵我。佢嘅死一方面令我加速成長，不過另一方面亦令我成長困難，因為無一個爸爸、無一個真男人去畀紀律你，去畀方向你。呢個時候我媽媽母兼父職，所以我真係好多謝佢。」
至於佢去曼聯，都好明白條路一定好難行，亦表現出佢嘅自信真係麻麻：「我從來唔會應承人，我只會話我會盡力嘗試。因為你應承人但係做唔到，只會令自己壓力增加。每次香川真司同我講到曼聯，佢都帶畀我正面感覺，不過佢亦有講到我必須盡力做好一切，否則只有離開一途。我知唔會有人保證我嘅位置，我要盡力嘗試自可以得到正選之位。不過我都喜歡困難嘅挑戰，因為你戰勝佢，你就會變得更強。」

依家佢面對嘅困難，正正就係一位強大的球員擋在身前，佢就係馬達喇。當大家都認為米希達利恩一定會取代馬達，呢個時候返而係米希達利恩淪為後備。摩連奴有解過話，話第一場聯賽佢用馬達係因為預計般尼茅夫會谷前，想用馬達攝對手後防空位。不過點都好，其實摩帥都係希望用最好的球員對應不同情況，呢一刻米希達利恩可能無咩信心、無咩狀態，摩帥先暫時唔重用，不過只係睇佢對修咸頓時後備上陣嘅20分鐘左右，已經見到佢同馬達的分別：馬達打法好優雅，傳送都好準，只係皮球於佢腳下節奏就會變得慢，侵略性略為不足。反之，米希達利恩只係上陣20分鐘唔夠，交出的6腳傳送悉數都係向前交嘅，尤其一次打反擊時傳送畀普巴最為耀眼。更重要嘅係，佢唔單止可以打中間嘅攻擊球員，更多人期望佢打返熟悉的右路，同埋華倫西亞組成又快又有殺傷力嘅右路攻擊線。大家記得畀啲時間，睇下呢位亞美尼亞人點樣加強曼聯嘅攻擊線啦！