普巴：兩皇馬球員說我跟摩帥

訪問普巴絕對無可厚非，因為佢依家係天價球員，身價同當年的小伙子真係好大差別。不過提到以前，佢睇嚟都仲係幾掛住曼聯、幾掛住隊友咁噃！

提到呢個長大嘅地方，普巴顯出好有感情：「我好記得青訓學校個樣，經過時腦海有自己當年訓練時的畫面出現返。我見到哉斯（Warren Joyce，曼聯預備組教頭），我好記得同佢一齊操練；我記得個更衣室，記得飯堂，所有事物同我記憶中都仲係一樣。真係有聲有畫，我言語間形容唔到，總之就係好瘋狂的一件事。如果真係要講，我會話係開心囉，老老實實，真係筆墨難以形容。充斥我腦海只有快樂，我已經急不及待要同我嘅新球隊一齊努力。當然呢隊唔係真係一隊新球隊，我離開過，又返咗嚟，感覺真係好特別。我幾年前第一個訪問都係呢到做，依家好似係再做一次咁，只係我高大咗、大隻咗，同埋大個咗。不過，我依然好享受。」
至於佢呢個返屋企嘅決定，竟然係由2個外人去游說佢，仲要係2個皇馬人：「我同過幾個同摩連奴共事過嘅球員傾計，好似係艾華路莫拉達、華拉尼咁，佢哋都話摩帥就係我嘅伯樂，佢帶我會令我更努力，而且我會進步更多。其實我知嘅，之前同摩帥講過2句，佢已經畀到正能量我，所以我就同自己講，『why not？』我肯肯定佢可以幫我成為一個更好嘅球員，一個更好嘅人。依家我第一目標就係英超冠軍，因為我未拎過；其次當然就係歐聯啦。作為個人夢想，我都好想以金球獎作為目標。不過呢…都係英超先啦！」

如果大家有留意，連格特對於普巴返嚟特別開心，因為佢哋喺青訓營入面係好朋友，更加係當年少年足總盃冠軍隊伍的成員之一。佢哋關係係唔係特別hehe…唔係，係特別好嘅呢？佢咁講：「我哋成日都有傾計架，有聯絡開。對於佢嘅近況我真係好開心，能夠Keep到一直以來嘅質素，我以佢為榮。我知佢來來回回，外借、返嚟、又外借，但係連格特就係連格特，佢總係識點入波。同樣，我都見到森莊士東、韋爾堅尼佢哋，好開心可以再見。我返嚟喇，我要為球迷帶來開心，要表現出我仍然都係普巴。我嚟到唔係要開玩笑，而係要令球迷真真正正感到可以觸及英超冠軍。呢個正正係我返嚟的原因。」
文章來源：http://www.manutd.com/en/New-Signings-2016-17/Paul-Pogba/Paul-Pogba-News-and-Features/2016/Aug/video-new-manchester-united-signing-paul-pogba-mutv-interview-part-2.aspx

https://www.facebook.com/manchesterunited/videos/10153951361482746/