朗尼終放棄 直言轉打中場 精選

剛剛攻入個人於奧脫福第100個英超入波嘅朗尼呢2年其實都幾多新聞，當中少不免就係佢應該打咩位置。打慣前鋒嘅佢最近2年入波已經無之前咁多，速度同控球能力比起高峰時嘅佢亦差唔少，反而係閱讀球賽能力同埋長傳、轉守為攻、助攻等等範疇都進步咗，令好多球迷、傳媒都話佢係時候學下史高斯越打越後。不過朗尼唔想打中場亦做得好揚，好多時都同傳媒暗示明示。而對於呢個課題，佢終於都有退讓嘅跡象喇！

佢咁講：「有時你要在事業中好好作出選擇，呢一刻我知打後啲對我而言係好事。打國家隊有啲唔同，我都仲可以打下前鋒；不過下季喺曼聯我估自己都係出任中場居多架喇。」老老實實，筆者其實認為朗尼喺英軍更加無得揀，華迪、哈利卡尼、史杜列治，甚至係新任小國腳拉舒福特都可以打前鋒，朗尼嘅競爭絕對唔細。反而喺曼聯，馬迪爾可以打翼；淨返拉舒福特、迪比同威爾遜同佢爭，可能都仲有機會打前鋒。不過點都好，你識諗、知道打中場可能更好，對你自己、對球會都係好事嚟！
其實朗尼都真係叻叻豬架，要喺同一個主場攻入100球，英超史上只有亨利一個試過，不過轉打中場之後就一定無咁多波入喇。大家不妨又睇下佢喺奧脫福入波嘅數據？

朗尼奧脫福100球
12碼：10球
右腳入波：77腳
左腳入波：12腳
頭槌：11個
禁區內：89個
禁區外：11個
自由球：4個
對邊隊入過最多波：維拉，共9球；阿仙奴、富咸都攻入過6球
你可能有疑問，舒利亞入波點都多過朗尼，點解佢又無呢個數據呢？無計，佢效力喜鵲時於聖占士球場只係攻入97個入波；效力布力般主場都攻入83球，不過就無喺同一個場攻入過100球囉…高貝利大帝亨利喺高貝利攻入過114球架！朗尼打唔打破到呢個紀錄呢？老老實實，真係要努力啲先得喇！

https://cdn.video.playwire.com/19004/videos/4895057/video-sd.mp4朗尼啲長傳有幾靚，睇下昨晚曼聯2個入球就知啦！