雲帥：唔係拉舒福特救咗我，係我畀機會佢咋！

先有一個馬迪爾，然後再有一個拉舒福特、一個華利拿、一個波夫域積遜，一班後生仔極速上位之餘，更有傳媒形容呢一班小魔將為「新92」班。後生仔如此好成績當然係好事，不過亦有唔少人認為係佢哋救返雲帥一命。對於呢個講法，佢好似唔太認同咁噃！

雲帥話，一班小伙子應該要好好多謝佢先啱：「我聽到有人話拉舒福特救咗我，nono！佢多謝我都嚟唔切，多謝我嘅政策、球會嘅政策，同埋佢都證明到自己先得嘅。年輕球員好想去表現自己，畀領隊睇、畀全世界睇，要大家都知佢哋有幾好，呢團火已經可以組成球隊精神。所以我哋先決定一月唔買人。我2個月前已經講過原因，只係大家唔信、唔入耳。我嘅方法係令球隊少一啲選擇，進而畀年輕球員一個上位機會。當然呢個做法有一定風險，因為年輕球員唔太穩定，好少有人好似馬迪爾表現咁平穩。不過我都想試下，於是後衛唔夠人時我決定唔買，畀波夫域積遜、華利拿去上陣，亦係點解冬季轉會窗時有西班牙球會想要華利拿外借，而我哋拒絕嘅原因。」
呢個算唔算半馬後炮式嘅講法不得而知，不過事實係拉舒福特都真係得到幾多注意，就連英軍主帥鶴臣據稱都會出席曼聯對西布朗的比賽睇實拉舒福特比賽，評估下會唔會將佢召入大國腳陣容當中出戰歐國盃！連埋之前嘅連格特，睇嚟鶴臣對於雲高爾的眼光都幾有信心，雲帥肯用嘅鶴臣都會想試下用咁噃！