有片睇!介紹返,佢係拉舒福特!

曼聯專區 於 26/02/2016 發表 收藏文章
拉舒福特(Marcus Rashford)呢個大家應該都幾陌生嘅名字,自昨晚歐霸一戰之後應該都成為大家話題之一,因為佢喺曼聯5:1擊敗米迪蘭特梅開二度!呢場比賽睇比數、睇埋門曼聯都佔優,不過其實完半場前後都有啲隱憂,因為當時仲係1:1的比數,偏偏馬達12碼射失、靴里拉都有一個黃金頭槌機會唔入,好多時強勢球隊如果久攻不入、把握唔到機會,好容易就會臨天光輸返轉頭。不過就喺呢個關鍵時刻,拉舒福特就幫曼聯打夠定心針入夠2球,最終都助球隊次回合反勝晉級。所以就等呢個大好機會介紹一下呢位小朋友啦!

出生日期:1997年10月31日
出身球會:Fletcher Moss Junior club
加盟時間:2014年7月1日

首先要提提,就係呢一位小將都可以算得上係「根正苗紅」,16歲加盟曼聯的青訓,極速已經得到現役青訓阿頭畢特的重用,今季在歐洲足協青年聯賽入面畀埋個隊長臂章佢,皆因佢對燕豪芬青年軍的比賽時已經梅開二度,對禾夫斯堡亦有波入。上一季佢都為曼聯u18攻入13球,係首席射手嚟,受人注目其實唔奇。

而且唔單止曼聯自家人睇得起佢,連好嘈嘅鄰居都留意過佢,上年曼城一度向佢問價,不過最終拉舒福特都決定留喺曼聯。雲高爾都對佢投下信心一票,今季帶過佢2次出去作客,對屈福特、李城都有後備位置畀佢,只係最後無被換出而已。

對於呢位小將,畢特都幾大期望:「咁多年青球員在隊,不過你好快就會留意到拉舒福特,因為你睇佢踢波會問自己:『點解唔畀佢上一隊比賽?』對我而言佢好top,有爆炸力、有潛質,而且好勤力。當然啦,佢仲有好多嘢要學,特別係臨門一門的質素同埋位置感都有進步空間。」

不過再好的球員都有弱點,拉舒福特有咩弱點呢?畢特就話佢好喜歡做高難度嘅事:「作為教練梗係想佢入多啲波,所以我哋會畀多啲合適嘅資訊佢,好似我哋會畀雲尼斯達萊啲入波畀佢睇,等佢學下點喺6碼區入波。不過拉舒福特好不安於室,身在6碼區時無咩耐性、成日心急走返出禁區攞波,再返入去攻門。呢個來回禁區邊的攻門技巧真係好難架,要用呢個方式keep住有入波係非常困難。不過佢都真係好勤力、好肯付出先有呢個問題,仲好肯學。」

可能因為好勤力,呢位小將唔單止前鋒可以打,攻擊中場幾個位置都可以勝任,其實都真係幾值得注意!當然啦,佢呢場波可以入夠2球都有其他因素,呢點筆者就之後再同大家傾喇!

https://www.youtube.com/watch?v=rdpk7Kzz5Do
標籤: 拉舒福特  

留言


請按此登錄後留言。未成為會員? 立即註冊
  • rickytct 於 26/02/2016 評論 NO. 1

    我覺得尋日果兩個唔係證明到好多野,仲有待觀察

  • 鴨鴨 於 26/02/2016 評論 NO. 2

    面對那種等級的球隊贏是應該的吧,有需要吹得這麼誇張

  • swans 於 26/02/2016 評論 NO. 3

    之前新C朗,新亨利,今次係新邊位呢?

快捷鍵:←
快捷鍵:→