曼聯專區小評：馬達的破釜沈舟 精選

最近的曼聯新聞，不外乎摩連奴正主動send大量的cv到奧脫福、曼聯高層已經讓步予「魔連奴」、為與哥帥一爭曼市之王的寶座摩連奴入魔是必需的、等等等等。當然，好多評論都開始出現，有人撐摩連奴成魔、有人反對。講摩帥可能大家都已經講到口臭，不如睇睇另一啲嘢，例如馬達。

眾所周知馬達與摩連奴關係就好似前度同現任女友一樣，簡直可以用「有你無我」嚟形容。依家風吹得咁行，馬達當然好擔心摩連奴真係入主奧脫福，到其時自己一定又再淪為棄將。其實佢自己都好明白，所以睇數據就知佢真係非常之搏老命，般尼茅夫的安祖舒文係英超最勤力的球員，成季跑成303公里；而馬達就係曼聯最勤力的球員，今季已跑動249公里，差少少就成為英超十大勤力王之一。未必可以追得上舒文，不過呢個數據都睇得出，佢真係好想用對腳跑走摩連奴的入魔希望。
諷刺嘅係，佢跑就跑得遠喇，只係佢速度真係唔高。之前佢一直發揮唔到好嘅作用，係因為佢成日被安插喺右中場，要知道打翼的話有2個技能係好重要嘅，一係你就跑得好似禾仔咁快（係禾確特，唔係李健和）；一係你就好似碧咸咁，下下長傳又獨又準又遠，如果唔係身在邊路又要cut返入中場先做到嘢的話，比賽節奏會被拖慢之餘，對手又返哂嚟佈陣，腳法再好都無辦法一個扭幾個。馬達就係咁樣，喺右路消耗咗好多時光，因為跑得唔快之餘長傳又唔太有效，加上又唔係好撞得，成日畀人一逼就甩，令唔少球迷認為佢無料到。只係佢最擅長的短傳快攻，喺之前的陣式真係發揮唔到。

而呢兩場曼聯比賽之所以有啲起色，與馬達的位置改變亦有一定影響。因為有連加特打右，馬達可以移入中路一啲，唔駛要佢追波同cut返入中場，佢就可以用多啲擅長嘅短傳戰術，講短傳佢創造性真係非同一般，有佢控制中場、分邊派牌，左右路的馬迪爾同連加特就多咗空間去創造，某程度上亦造就波夫域積遜同達美安嘅後上助攻。人又多咗，空間又多咗，攻擊力咪好似解放咗咁囉。睇到呢到，就睇得出其實個關係都幾千絲萬縷，成績差雲帥就坐唔穩，摩連奴就大機會嚟到，馬達就無運行；偏偏改善呢個情況的關鍵人物就係馬達，佢可以發揮到中前場的攻擊指揮能力，曼聯就有望改善成績，雲帥就留效有望。
筆者自己就最想睇到曼聯搵多隻勁嘅左翼配上右路連加特，中場由馬達同靴里拉派牌發板，馬迪爾與朗尼2人在前鋒線上爭戰，組成442入面中前場「42」的組合。加埋梳爾、達美安，中間史摩寧、鍾斯，呢個陣練多幾個月、有默契的話，應該幾有火花。只係摩帥一到，呢個陣就真係煙消雲散lu……

睇睇片，就知佢對史篤城時幾有作用：
https://www.youtube.com/watch?v=ubYa_2GSLfE