曼聯專區小評：迪基亞與皇馬禁令 精選

過去一星期中，最大的球壇大事應該要數「雙馬」皇馬、馬體會因為在年輕球員的轉會上犯規被國際足協處罰，在接下來的夏季、一月轉會窗都不能買賣球員。呢件事對於曼聯嚟講，可以說是未知吉凶。上季季尾走唔到，更加續約到2019年、人工係之前3倍，呢一切都未必係迪基亞必然留隊的證據，始終佢都係西班牙人，返皇馬爭戰、離開令人感到一次又一次氣餒的曼聯絕唔係奇事。只係，家下皇馬禁令之下，又會唔會令曼聯留多佢一段時間？

根據0消息，皇馬對於今夏奪得迪基亞仍然係信心滿滿，佢哋高層早前開會一致認為上訴會成功，即係話有信心打甩禁令。基於呢個確信佢哋會有2個後續行動：首先係，一月唔會急於搶人，最少迪基亞都會留效曼聯多半個球季；而另一個可以預視嘅係，夏季轉會時皇馬會不惜一切「追迪」唔會令上年的故事發生多一次。係，貴就一定貴過上年架喇個價，因為迪基亞有長約在身嘛，然而皇馬會點做大家都估到，下年仲有無鋼龍真係好難講。
只係，上訴係唔係真係咁容易？而且皇家高層的「確信」又係唔係咁有理據？巴塞之前就係打唔甩禁令，唯有快快手入定阿蘇同拿傑迪錫，之後就一直等等等，連新將阿達杜倫同阿歷斯維度都要等到今個一月先可以註冊、為「塞」上陣。如果皇馬唔學當年巴塞「買定先」，真係一個唔該上訴失敗，咁迪基亞就要留多一年半載喇。

拿，人哋點就真係控制唔到，不過迪基亞對於曼聯嚟講就真係仲係好重要。依家曼聯戰術飄忽、唔太穩定，一時就絕對防禦慢慢搓，橫傳後傳對於後防的壓力唔大；不過有時又變成「冒險王」，肯搏下(雖然對紐卡素入夠3球都得12腳攻門)。絕對防禦時可能無咩機會畀迪基亞表演，不過對紐卡素時就睇到佢嘅重要性，唔係有佢真係輸埋畀呢隊榜末球隊都唔奇。留多年好唔好？梗係好啦！最好上訴失敗添呀！