ESPN：死線確定！雲帥必須贏餘下2場聯賽

雲帥烏紗戴唔穩一事應該都堅堅哋，因為ESPN收到曼聯內部消息指，雲帥已經得返2場波去逆轉一切，再輸的話就要執包袱喇…呢2場，分別就係對史篤城及對車路士的比賽喇。

其實輸畀諾域治的比賽之後，已經有高層想雲帥「自願離職」，更認為唔「自裁」就應該要炒。不過呢班人都只係少數，大部分高層都認為曼聯有自己一套傳統，唔應該出爾反爾、反口覆舌。早前高層應該真係講過，只要餘下2場比賽輸的話雲帥就無得留低，所以輸畀金絲雀之後仲仍然留雲帥烏紗，畀多次機會佢。消息指，曼聯高層同雲帥的關係其實幾好，加上念在呢份都應該係雲帥最後一份工，唔想佢被炒完結領隊生涯，於是先唔落重手。只要佢贏到呢2場波，就可以教耐啲咁話。
至於摩連奴喇wor，內部消息指無論雲帥走唔走，曼聯都陷入兩難。首先，原來紅魔鬼的頭號「獵物」仍然係哥迪奧拿，希望不惜一切請到佢嚟領導曼聯，加上外間傳佢去曼城都未有好實在的消息，所以高層們唔到最後一刻都唔希望放棄。不過咁嘅話可能就跌入兩頭唔到岸嘅境地，因為摩帥都講明自己唔想抖，亦有西媒指皇馬想狂人重回舊地，一個手腳慢摩連奴就可能「名草有主」，到時哥帥又唔嚟、摩帥又請唔到，咁就GG喇。當然啦，摩帥的個人風格同曼聯唔太夾促使唔少高層對佢有保留，想要哥帥多啲唔難理解嘅。

ESPN指如果雲帥走又請唔到摩連奴的話，傑斯都會教住先直到季尾，因為哥帥最早都要7月先變返自由身嘛，佢真係嚟都有個空窗期嘅。睇怕大家想見多次傑斯教曼聯，就真係要望望2015年度最後2場聯賽成績如何喇。