雲帥call到！馬迪爾竟叫媽媽聽？ 精選

講到馬迪爾，大家一定係好開心好期待，因為佢水貨味真係唔重，就算係無波入，都有啲入楔呀、攻門睇下，對阿仙奴時雖然輸波，不過最有機會入嘅黃金機會佢都有份，一腳於門前冷靜剔波轉身射門，唔係咁啱得咁轎中施治隻腳，隨時為曼聯破蛋…不過，原來年紀咁細嘅佢加盟曼聯，真係要「問過媽媽」架！點解要問過佢？唔係因為佢乖乖聽話，而係因為…唔識英文，要靠媽媽做翻譯！不過咁，呢個電話其實都幾重要架：「雲帥打畀我令一切都唔同哂，真架。原本摩洛哥無打算賣走我，我自己都以為會留在球隊當中。不過我聽到雲帥開嘅條件就已經唔到我去考慮了。我自己都好想繼續打歐聯，所以都係好事。不過佢打嚟時我只可以畀我媽媽充當翻譯…不過雲帥真係好支持我，對於我呢種年紀嘅球員而言真係好重要。」
英文對於馬迪爾嚟講真係好難搞，原來佢真係可以話係單字都唔識，情況嚴重到連數字都唔曉。佢嘅同鄉舒尼達連充當佢老師教英文，第一下就要出動bingo嚟幫手，都咪話唔驚…你唔係唔知咩係bingo呀嘛？手上有一張紙寫滿數字，主持會抽唔同數字大聲講出嚟，你張紙有嘅就剔咗佢，直到你打橫打直打斜求其一行中哂就叫贏喇！無錯，馬迪爾梗係玩英文版本啦…

不過英文唔好，都無辦法阻到隊友嘅熱情架：「我嚟到曼聯大家都好歡迎我，第一日咋，個個都嚟同我見面。佢哋個個都想同我傾計，最衰我唔識英文啦…不過情況會一日比一日好嘅。我已經打咗幾場比賽，入咗幾球，繼續保持呢個氣勢我應該可以畀雲帥知道我係信得過嘅球員。不過我知架，我係球隊次席射手嘛！由入利物浦一球開始我就知道喇，雲帥由嗰日起就開始畀機會我了。」