「馬」上挑戰紀錄保持者們

云云英超中自必然有唔少紀錄保持者，有紀錄當然就有破嘅一日啦！無啦啦講咩紀錄？咪就係因為馬迪爾開咗個好頭，2次為曼聯上陣嘅聯賽都有波入，對利物浦、對修咸頓都有進賬，對英超失球最多、6場失夠13球的新特蘭，佢好有可能再下一城。連續3場、4場入波的話，佢可以追到邊一啲前輩呢？

第一個可以追到嘅前輩就犀利囉，佢個名叫「沒有人」。你無睇錯，因為可以在英超首次出場嘅3場比賽入面場場有波入嘅曼聯球員，到依家都仲係未出現過！前輩沙夏、馬捷達都在為曼聯上陣的首2場比賽入面入波(咁驚…2位魔途其實都麻麻咋噃…)不過就從未有一位係連續3仗都有波入嘅！
唔計英超，其實有一位曼聯球員曾經在首次出場的3場比賽入面都有波入，佢就係1972年時嘅摩亞，不過當時英超仲未出世…如果馬迪爾可以在對新特蘭時入波，佢就可以追到「沒有人」同埋43年紀錄保持者摩亞喇！

等我哋跳出曼聯先，英超紀錄王係首6場英超處子比賽場場有波入，呢位人兄係米基昆尼，喺1992創下呢個紀錄，即係英超首年就有架喇。馬迪爾要超越佢就有難度喇，對新特蘭都仲易，接下來曼聯要對阿仙奴、愛華頓、曼城同水晶宮，單單對兵同月亮都唔易入波，睇嚟要破呢個「六連環」真係唔易架！

仲有幾位前輩都有紀錄等住馬迪爾，不過依家講都係太早喇，好似科拿廿歲未到就入夠25球啦、都係廿歲未到嘅羅比堅尼頭10場比賽入6球啦、19歲朗尼當年一季都入11球架。只係呢啲都太遙遠喇，希望佢對黑貓入波先啦！一步一步嚟，ok？摩亞米基昆尼....咁classic嘅個樣...